Fransiýanyň “Pari Sen-Žermen” (PSŽ) futbol topary Angliýanyň “Arsenal” toparyny utup, Çempionlar ligasynyň ýeňijisi boldy. Final duşuşygy Budapeşt şäherindäki “Puşkaş Arena” stadionynda geçirildi. Duşuşyga germaniýaly emin Daniel Zibert eminlik etdi.
Oýnuň esasy hem-de her biri 15 minutdan ybarat bolan iki goşmaça wagty 1:1 hasabynda tamamlandy. Duşuşygyň 6-njy minutynda “Arsenalyň” oýunçysy Kaý Hawers hasaby açdy. 65-nji minutda bolsa, gruzin ýarym goragçysy Hwiça Kwarashelianyň gazanan penaltisini dogry ulanyp, Usman Dembele jogap goluny urdy.
Duşuşykdan soňky 11 metrlik jerime urgularynda parižliler has güýçli çykdy – 4:3.
Bu oýunda PSŽ-niň derwezesini russiýaly derwezeçi Matweý Safonow gorady.
Geçen ýyl Italiýanyň “Interi” bilen bolan final duşuşygynda 5:0 haabynda utan Fransiýanyň “Pari Sen-Žermen” futbol topary bassyr 2 ýyl yzly-yzyna Ýewropanyň iň güýçli topary bolmagy başardy.
Mundan ozal, diňe Ispaniýanyň “Real” topary yzly-yzyna iki gezke Çempionlar ligasynyň çempiony bolmagy başarypdy.
Duşuşygyň iň gowy futbolçysy hökmünde fransuz toparynyň portugal futbolçysy Witinýa saýlandy.
Şeýlelikde, 2026-njy ýylyň UEFA Superkubogy ugrundaky duşuşykda Fransiýanyň «Pari Sen-Žermen» we Angliýanyň «Aston Willa» toparlary oýnarlar. Bu duşuşyk 12-nji awgustda Awstriýanyň Zalsburg şäherindäki «Red Bull Arena» stadionynda geçiriler.
Final duşuşygyna tomaşa eden meşhur sport hünärmenleriniň hatarynda FIFA-nyň prezidenti Janni Infantino, şeýle hem Halkara Olimpiýa komitetiniň ozalky prezidenti Tomas Bah hem bardy.