Angliýanyň futbol ýygyndysynyň hüjümçisi Garri Keýn milli toparyň düzüminde geçiren oýunlarynyň sany boýunça täze rekord goýdy. Mundan ozal ol bu görkeziji boýunça milli ýygyndynyň öňki derwezebany Piter Şilton bilen birinji orny paýlaşýardy.
Milletler ligasynyň toparçalaýyn tapgyrynyň bäşinji aýlawynda Horwatiýanyň ýygyndysyna garşy öz meýdançasynda geçirilen duşuşyk Keýniň milli toparyň düzümindäki 126-njy oýny boldy.
33 ýaşly Garri Keýn 2023-nji ýylyň tomsundan bäri Germaniýanyň «Bawariýa» toparynda çykyş edýär. Ol bu toparyň düzüminde iki gezek Germaniýanyň çempiony bolup, iki gezek ýurduň Superkubogyny, şeýle hem bir gezek Germaniýanyň kubogyny gazandy.
Iňlis hüjümçisi 2024/25 we 2025/26-njy ýyllaryň möwsümlerinde Ýewropa çempionatlarynyň iň köp gol geçiren futbolçysyna gowşurylýan «Altyn buts» baýragyna mynasyp boldy. Şu ýylyň oktýabr aýynda bolsa ol France Football žurnalynyň wersiýasy boýunça möwsümiň iň gowy futbolçysyna berilýän «Altyn top» baýragynyň eýesi boldy.
Garri Keýn Angliýanyň milli ýygyndysynyň düzüminde 91 gol geçirip, bu görkeziji boýunça hem rekordyň eýesidir. Ol 2021-nji we 2024-nji ýyllarda geçirilen Ýewropa çempionatlarynyň kümüş medalynyň eýesidir.
2019-njy ýylda hüjümçi Angliýanyň ýygyndysyna Milletler ligasynyň ilkinji möwsüminde üçünji orny eýelemäge, 2026-njy ýylda bolsa dünýä çempionatynda bürünç medal gazanmaga ýardam etdi.
Keýn dünýä çempionatlarynyň taryhynda iň köp gol geçiren futbolçylaryň ilkinji bäşligine girýär. Onuň hasabynda 14 gol bar. Ol 2018-nji ýylda Russiýada geçirilen dünýä çempionatynda garşydaşlarynyň derwezesinden alty pökgi geçirip, ýaryşyň iň netijeli futbolçysy boldy.
Piter Şilton häzirki wagtda 77 ýaşynda. Ol 1966–1997-nji ýyllar aralygynda professional derejede futbol oýnady. Derwezeban tutuş futbolçylyk karýerasyny Angliýanyň klublarynda geçirdi.
Şilton «Nottingem Forest» toparynyň düzüminde Angliýanyň çempiony (1978), Ýewropanyň çempion klublarynyň kubogynyň iki gezek (1979, 1980), UEFA-nyň Superkubogynyň (1979), Angliýanyň Liga kubogynyň (1979) we Angliýanyň Superkubogynyň (1978) eýesi boldy.
Mundan ozal ol «Lester» toparynyň düzüminde Angliýanyň ikinji derejeli diwizionynyň çempionlygyny (1971) we Angliýanyň Superkubogyny (1971) gazandy.
Piter Şilton üç gezek — 1982-nji, 1986-njy we 1990-njy ýyllarda futbol boýunça dünýä çempionatlaryna gatnaşdy. 1990-njy ýylda geçirilen dünýä çempionatynda Angliýanyň milli ýygyndysy dördünji orny eýeledi.