Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň başlanmagynyň öňüsyrasynda Merkezi Aziýa döwletleriniň ýolbaşçylarynyň duşuşygy geçirildi.
Oňa türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, Özbegistanyň Prezidenti Şawkat Mirziýoýew, Täjigistanyň Prezidenti Emomali Rahmon, Gazagystan Respublikasynyň Prezidenti Kasym-Žomart Tokaýew we Gyrgyz Respublikasynyň Ministrler Kabinetiniň Başlygy Adylbek Kasymaliýew gatnaşdy.
Duşuşygyň dowamynda sebit ýurtlarynyň hyzmatdaşlygynyň geljekki ugurlary boýunça ileri tutulýan meseleler ara alnyp maslahatlaşyldy.
Gün tertibine laýyklykda, Merkezi Aziýa döwletleriniň ýolbaşçylarynyň nobatdaky Konsultatiw duşuşygyna Daşkent şäherinde görülýän taýýarlyklaryň esasy ugurlary ara alnyp maslahatlaşyldy.
Öňde boljak Daşkent duşuşygynyň çäklerinde Özbegistan tarapynyň syýasy dialogy çuňlaşdyrmak, ykdysady hyzmatdaşlygyň täze itergi berijilerini işe girizmek, serhet söwdasyny giňeltmek boýunça birnäçe başlangyçlary öňe sürmegi maksat edinýändigi nygtaldy. Üns merkezinde suw we energetika ulgamlarynda alnyp barylýan amaly hyzmatdaşlyk, ulag gatnaşyklarynyň giňeldilmegi, şeýle hem howanyň üýtgemegi bilen bagly meseleler bolar.
Duşuşyklara Azerbaýjan tarapynyň gatnaşýandygy kanagatlanma bilen bellenildi. Häzirki wagtda sebit ýurtlary Azerbaýjan bilen netijeli hyzmatdaşlyk edýär. Söwda, ulag we “ýaşyl” energetika ugurlarynda taslamalar durmuşa geçirilýär.