Türkmenistanyň energetika pudagy gaz çykarmak, Hazar deňzinde gözleg işlerini geçirmek, sebit infrastrukturasyny ösdürmek we tehnologik taýdan optimallaşdyrmak boýunça iri taslamalaryň öňe ilerlemegi bilen ösüşiň täze tapgyryna gadam basýar. Bu barada «Turkmen Energy Forum» tarapyndan ýaýradylan, «GaffneyCline» halkara energetika konsalting kompaniýasynyň sebit boýunça direktory Stiw Trewersiň makalasynda aýdylýar.
Kompaniýanyň bahalandyrmagyna görä, halkara energetika pudagynyň ünsi Türkmenistanyň ägirt uly serişde mümkinçiliklerinden taslamalaryň iş ýüzünde durmuşa geçirilmegine, infrastrukturanyň ösdürilmegine, bazarlara çykmak mümkinçilikleriniň giňeldilmegine we uzak möhletleýin hyzmatdaşlygyň ýola goýulmagyna barha köp gönükýär.
Bu täze tapgyry kesgitleýän esasy şertleriň biri hökmünde «Galkynyş» gaz käniniň mundan beýläk-de özleşdirilmegi görkezilýär. Onuň dördünji tapgyrynyň başlanmagy täze ulanyş guýularynyň burawlanmagyny hem-de harytlyk gazyň möçberini artdyrmak maksady bilen gazy taýýarlamak üçin degişli infrastrukturanyň döredilmegini göz öňünde tutýar.
Makalada bellenilýän ýene bir möhüm ugur Hazar deňzindäki gözleg işleridir. Kompaniýanyň maglumatlaryna görä, 1-nji blokyň çägindäki «Magtymguly» käninde A8 baha beriş-ulanyş guýusy synaglaryň dowamynda uly mümkinçilikleri görkezdi. Sebitdäki täze geljegi uly meýdançalar bolsa geologik we seýsmiki barlaglaryň ulanylmagy arkaly öwrenilmegini dowam etdirýär.
Makalada taslama kuwwaty ýylda 33 milliard kub metre çenli gaz bolan TAPI (Türkmenistan – Owganystan – Pakistan – Hindistan) gaz geçirijisine aýratyn orun berilýär. Bu gaz geçiriji Türkmenistanyň gaz serişdelerini Günorta Aziýanyň ösýän bazarlary bilen baglanyşdyrmalydyr. «GaffneyCline» kompaniýasy serişde binýadynyň we infrastrukturanyň sazlaşykly ösdürilmeginiň möhümdigini belleýär: «Galkynyş» käniniň özleşdirilmegi gaz çykaryş kuwwatyny artdyrsa, TOPH sebit bazarlaryna çykmak üçin täze mümkinçilikleri açýar.
Kompaniýanyň bahalandyrmagyna görä, gaz serişdeleriniň ösdürilmegi, Hazar deňzinde gözleg işleriniň alnyp barylmagy, infrastrukturanyň giňeldilmegi we uzak wagt bäri ulanylýan aktiwleriň tehnologik taýdan optimallaşdyrylmagy halkara operatorlary, inžiniring we hyzmat kompaniýalary, tehnologiýalary işläp düzüjiler hem-de maslahatçylar üçin täze mümkinçilikleri döredýär.
«GaffneyCline» «Turkmen Energy Forum-yň» tehniki hyzmatdaşy, şeýle hem 2026-njy ýylyň 21–23-nji oktýabrynda Aşgabatda geçiriljek «Türkmenistanyň nebiti we gazy – OGT 2026» atly 31-nji halkara maslahatynyň we sergisiniň bilelikdäki guramaçysy bolup çykyş edýär.
Makalada bellenilişi ýaly, Türkmenistanyň energetika pudagynyň ösüşiniň indiki tapgyry diňe bir onuň serişde binýadynyň gerimi bilen däl, eýsem taslamalaryň netijeli durmuşa geçirilmegi, döwrebap tehnologiýalaryň ulanylmagy we halkara hyzmatdaşlygyň berkligi bilen hem kesgitlener.