Fransiýanyň “PSŽ” topary täze möwsümiň öňüsyrasynda düzümini barha güýçlendirýär. “Liwerpul” toparyndan Jorjinýo Weýnaldumy, “Inter” toparyndan Aşraf Hakimini hem-de “Real Madrid” bilen şertnamasy tamamlanan Serhio Ramosy satyn alan fransuz topary Ýewropanyň iň güýçli derwezebany bilen hem şertnama baglaşdy.
“Milan” toparynda çykyş eden Janluiji Donnarumma “PSŽ” topary bilen 2026-njy ýyla çenli şertnama baglaşdy. Donnarummanyň “Milan” toparyndaky şertnamasynyň möhleti tamamlanyp, ol erkin futbolçy bolupdy.
22 ýaşly derwezeban “Napoli” we “Milan” toparlarynyň akademiýasynda tälim aldy. Ol 2015-nji ýylda “Milan” toparynyň düzümine goşuldy.
Donnarumma Italiýanyň milli ýygyndysynyň düzüminde 33 duşuşykda çykyş etdi. Ol Ýewropa çempionatynda iň gowy futbolçy saýlandy.