Özbegistanyň Samarkant şäherinde Türki Döwletleriň Guramasynyň agza döwletleriniň saglygy goraýyş ministrleriniň 3-nji duşuşygy hem-de 2-nji türki dünýäsi saglyk kongresi geçirildi.
Oňa Özbegistanyň saglygy goraýyş ministri Amdillo Inoýatow, Türki Döwletleriň Guramasynyň Baş sekretary Kubanyçbek Ömüraliýew, Azerbaýjanyň saglygy goraýyş ministri Teýmur Musaýew, Gazagystanyň saglygy goraýyş ministri Azhar Giniýat, Gyrgyz Respublikasynyň saglygy goraýyş ministriniň orunbasary Tilek Mamadaliýew, Türkiýe Respublikasynyň saglygy goraýyş ministri Fahrettin Koja we Samarkant şäheriniň häkimi Erkin Turdimow gatnaşdy.
Türki Döwletleriň Guramasynyň Baş sekretary Kubanyçbek Ömüraliýew duşuşykda eden çykyşynda türki döwletleriniň saglyk pudagynda uly mümkinçilikleriň bardygyny we netijeli saglyk ulgamyny döretmek boýunça bilelikdäki tagallalaryň güýçlendirilmelidigini belledi.
Gurama agza döwletleriň ministrleri öz çykyşlarynda saglyk ulgamynyň ösdürilmegi babatda hyzmatdaşlyga ygrarlydyklaryny mälim etdiler.
Saglygy goraýyş edaralarynyň ýolbaşçylary hususan-da, sanjymlar, dermanlar we lukmançylyk enjamlary babatda bilelikdäki ylmy-barlag toparyny döretmegiň möhümdigini bellediler. Şeýle hem gurama agza döwletleriň arasynda diplomlaryň hem-de lukmançylyk harytlaryna berilýän şahadatnamalaryň ykrar edilmegi, lukmançylyk syýahatçylygynyň höweslendirilmegi, adatdan daşary ýagdaýlar üçin bilelikdäki halas ediş toparyny döretmek babatda pikir alşyldy.
Duşuşygyň jemleri boýunça gurama agza döwletleriniň saglygy goraýyş ministrleriniň 3-nji duşuşygynyň bilelikdäki beýannamasyna gol çekildi.