Birleşen Milletler Guramasynyň Baş sekretary Antonio Guterreş kabul ediji ýurduň hökümetiniň razyçylygy bilen Hytaý Halk Respublikasyndan Sýaoçžýun Greýs Wany Türkmenistandaky BMG-niň Hemişelik utgaşdyryjysy wezipesine belledi. Ol öz wezipesine resmi taýdan 2026-njy ýylyň 1-nji iýulynda girişdi. Bu barada BMG-niň Ösüşi utgaşdyrmak boýunça müdirligi habar berdi.
Wan halkara ösüşi ulgamynda 28 ýyllyk iş tejribesine eýedir. Ol durnukly ösüş, köptaraplaýyn hyzmatdaşlyk, ösüşi maliýeleşdirmek we halkara hyzmatdaşlygy ugurlarynda ýolbaşçy wezipelerinde işledi.
Soňky döwürde ol BMG-niň Günorta–Günorta hyzmatdaşlygy boýunça edarasynyň Maksatly gaznalar bölüminiň direktory wezipesinde işledi. Bu wezipede ol Günorta–Günorta hyzmatdaşlygynyň ählumumy maksatly gaznalaryna we BMG ulgamynyň gaznalaryna ýolbaşçylyk etdi, şeýle hem Durnukly ösüş maksatlaryny durmuşa geçirmek üçin hyzmatdaşlygy ösdürmek we serişdeleri toplamak boýunça işleri utgaşdyrdy.
Wan mundan başga-da BMG-niň Ösüş maksatnamasynyň (UNDP) baş edarasynda birnäçe ýolbaşçy wezipeleri eýeledi. Şolaryň hatarynda Günorta–Günorta hyzmatdaşlygy boýunça baş geňeşçi we Garyplyga garşy göreş boýunça ählumumy tejribe ugrunyň ýolbaşçysy wezipeleri bar.
BMG ulgamyna goşulmazdan ozal, Wan Aziýada we Ýewropada köpçülikleýin habar beriş serişdelerinde, gaznalarda hem-de ylmy-barlag edaralarynda işledi.
Sýaoçžýun Greýs Wan Londonyň uniwersitetinde bilim we halkara ösüş ugry boýunça filosofiýa ylymlarynyň doktory (PhD) derejesini, Pekin Daşary ýurt dilleri uniwersitetinde Britan barlaglary boýunça magistr derejesini we Stellenbos uniwersitetiniň Inklýuziw Saglygy goraýyş Dolandyryşy Merkezinde diplomdan soňky bilim diplomyny aldy.