15-nji oktýabrda Azerbaýjanyň paýtagty Baku şäherinde Aziýada özara hyzmatdaşlyk we ynamy berkitmek çäreleri boýunça Geňeşiň (CICA) 7-nji sammiti geçiriler.
Bu sammitde guramany mundan beýläk-de ösdürmek, şol sanda ony Ýewraziýa giňişliginde dürli köptaraplaýyn platformalaryň arasyndaky hyzmatdaşlygyň umumy ulgamyna utgaşdyrmak meselelerine serediler.
Sammitiň gün tertibi sebitiň durnukly ösüşini üpjün etmek, tutuş yklym derejesinde özara baglanyşyklary berkitmek, täze ýüze çykýan wehimlere we howplara, şol sanda halkara maglumat howpsuzlygy ulgamyndaky howplara garşy göreşmek meseleleriniň töwereginde jemlener.
Guramanyň gün tertibine girýän amaly hyzmatdaşlygyň ugurlarynyň giň toplumy, duşuşyga gatnaşyjylar halkara we sebit derejesindäki möhüm meseleler boýunça hem pikir alşarlar.
Geňeşiö düzümine 28 döwlet girýär: Russiýa, Azerbaýjan, Owganystan, Bangladeş, Bahreýn, Wýetnam, Müsür, Ysraýyl, Hindistan, Iordaniýa, Yrak, Eýran, Gazagystan, Kamboja, Katar, Gyrgyzystan, Hytaý, Kuweýt, Mongoliýa, Birleşen Arap Emirlikleri, Palestina, Pakistan, Koreýa Respublikasy, Täjigistan, Tailand, Türkiýe, Özbegistan we Şri-Lanka.
Sammitiň netijesinde kabul edilmegine garaşylýan kararlaryň biri hem Laosyň Geňeşe doly hukukly agza hökmünde kabul edilmegi bolar.
Duşuşyga synçylar hökmünde Belarus, Indoneziýa, Laos, Malaýziýa, Saud Arabystany, Türkmenistan, Filippinler, Arap döwletleriniň ligasy, Halkara Migrasiýa Guramasy we Birleşen Milletler Guramasy, şeýle hem hyzmatdaş guramalar hökmünde Ykdysady Hyzmatdaşlyk Guramasy, Şanhaý Hyzmatdaşlyk Guramasy (ŞHG) we BMG-niň Neşe serişdeleri we jenaýatçylyk boýunça müdirligi çagyryldy.
Aziýada özara hyzmatdaşlyk we ynamy berkitmek çäreleri boýunça Geňeş — sebitdäki möhüm meseleleri ara alyp maslahatlaşmak, gatnaşyjy döwletleriň arasynda hyzmatdaşlygy ösdürmek, syýasy, ykdysady, ynsanperwer ugurlarda, şeýle hem täze wehimler we howplar babatda ynanyşmagy pugtalandyrmak maksady bilen döredilen köptaraplaýyn dialog meýdançasydyr.
Sammitler dört ýyldan bir gezek geçirilýär. Geňeşiň çäginde ýokary derejeli yzygiderli duşuşyklar, ýokary wezipeli adamlaryň we bilermenler toparlarynyň mejlisleri, şeýle hem ynanyşmak çärelerini durmuşa geçirmäge bagyşlanan tematiki çäreler geçirilýär.
Geňeşiň başlyklygy iki ýyl möhlete saýlanýar we onuň ygtyýarlyk möhletini soňundan uzaltmak mümkinçiligi göz öňünde tutulýar.
1999–2010-njy ýyllarda we 2020–2024-nji ýyllarda başlyklyk wezipesini Gazagystan ýerine ýetirdi. 2010–2014-nji ýyllarda Geňeşe Türkiýe, 2014–2018-nji ýyllarda Hytaý, 2018–2020-nji ýyllarda bolsa Täjigistan başlyklyk etdi.
2024-nji ýyldan bäri Geňeşe Azerbaýjan başlyklyk edýär.