Türkiýäniň «Galatasaraý» toparynyň russiýaly ýarymgoragçysy Alekseý Batrakow soňky bäş ýylyň dowamynda Çempionlar ligasynyň duşuşygynda gol geçirmegi başaran ilkinji rus futbolçysy boldy.
Batrakow Çempionlar ligasynyň umumy tapgyrynda Ispaniýanyň «Barselona» toparyna garşy geçirilen duşuşygyň 28-nji minutynda hasaby açdy. Şondan öň Ýewropanyň iň abraýly klub ýaryşynda gol geçiren soňky rus futbolçysy Magomed Ozdoýew bolupdy. Ol 2021-nji ýylyň 8-nji dekabrynda «Zenitiň» düzüminde Angliýanyň «Çelsi» toparynyň derwezesine gol geçiripdi.
Şondan öň ýewrokubok ýaryşlarynda «Barselonanyň» derwezesine gol geçiren soňky rus futbolçysy Andreý Arşawin bolupdy. Ol 2011-nji ýylyň 16-njy fewralynda Angliýanyň «Arsenal» toparynyň düzüminde Çempionlar ligasynyň 1/8 finalynyň ilkinji duşuşygynda tapawutlanypdy. Arşawiniň geçiren goly toparyna 2:1 hasabynda ýeňiş gazandyrdy.
Umuman, Çempionlar ligasynda «Barselonanyň» derwezesine alty rus futbolçysy gol geçirmegi başardy. Emma olaryň arasynda diňe «Spartagyň» düzüminde çykyş eden Waleriý Karpin bu üstünligi iki gezek gaýtalap bildi.
«Barselonanyň» derwezesine geçirilen gol Batrakowyň «Galatasaraýa» geçenden soňky ilkinji goly boldy.