Azerbaýjanyň we Türkmenistanyň Kärdeşler arkalaşyklarynyň arasyndaky hyzmatdaşlygyň mümkinçilikleri ara alnyp maslahatlaşyldy. Azerbaýjanyň Kärdeşler arkalaşyklary Konfederasiýasynyň başlygy Sahib Mammedowyň ýolbaşçylygyndaky wekiliýeti Türkmenistanda sapar bolýar.
Saparyň çäginde, Türkmenistanyň Kärdeşler arkalaşyklarynyň Milli merkezinde Azerbaýjanyň Kärdeşler arkalaşyklary Konfederasiýasynyň wekiliýeti bilen duşuşyk geçirildi.
Türkmenistanyň Kärdeşler arkalaşyklarynyň Milli Merkeziniň başlygy Oguljennet Berdiliýewa gatnaşyjylara Türkmenistanda zähmet hukuklaryny goramak, işgärleriň durmuş goragyny güýçlendirmek we kärdeşler arkalaşyklarynyň agzalaryny goldamak mehanizmlerini kämilleşdirmek boýunça alnyp barylýan işler barada maglumat berdi. Ol türkmen tarapynyň Azerbaýjandaky kärdeşler arkalaşyklary bilen gatnaşyklary giňeltmäge we tejribe alyşmaga gyzyklanýandygyny belledi.
Azerbaýjanyň Kärdeşler arkalaşyklary Konfederasiýasynyň başlygy Sahib Mammedow öz ýurdundaky kärdeşler arkalaşyklarynyň işleri, zähmet hukuklaryny goramak, sanlylaşdyrmak prosesi we innowasion başlangyçlar, şeýle hem kärdeşler arkalaşyklarynyň agzalary üçin hyzmatlaryň hilini we elýeterliligini ýokarlandyrmak üçin durmuşa geçirilýän çäreler barada gürrüň berdi.
Konfederasiýanyň başlygy öz çykyşynda dowam edýän durmuş ugurly taslamalar, kärdeşler arkalaşyklarynyň agzalaryna berilýän hukuk kömegi, şeýle hem syýahat ýollanmalary ulgamynyň sanly özgerdilmegindäki we dynç alyş merkezleriniň hyzmatlaryny döwrebaplaşdyrmakdaky täzelikler barada maglumat berdi.
Taraplar 2026-njy ýylyň maý aýynda Bakuda gol çekilen hyzmatdaşlyk ähtnamasyndan gelip çykýan wezipeleriň ýerine ýetirilişini, gatnaşyklary giňeltmek, bilelikdäki taslamalary durmuşa geçirmek, tejribe alyşmak we özara gyzyklanma döredýän beýleki meseleleri ara alyp maslahatlaşdylar.
Azerbaýjanyň Kärdeşler arkalaşyklary Konfederasiýasynyň wekiliýeti şeýle hem Türkmenistanyň Kärdeşler arkalaşyklarynyň Milli merkeziniň işi bilen tanyşdy.