2026-njy ýylyň 28-nji martynda Aşgabat şäherinde ýerleşýän S.A. Nyýazow adyndaky Türkmen oba hojalyk uniwersitetinde (TOHU) «XXI asyr marketing» atly açyk sapak geçirildi. Çärede çykyş eden hünärmen Elbek Hudaýarow häzirki zaman marketing ugurlarynyň ösüşi, täze tehnologiýalaryň täsiri hem-de sanly dünýäde netijeli iş alyp barmagyň usullary barada giňişleýin gürrüň berdi.
Açyk sapagyň dowamynda gatnaşyjylar marketingiň häzirki zaman tendensiýalary, hususan-da sanly marketing, sosial ulgamlaryň täsiri, brend dörediş strategiýalary hem-de müşderi bilen netijeli aragatnaşyk gurmagyň ýollary barada möhüm maglumatlary aldylar. Şeýle-de çykyşda täze bilimleri amaly taýdan ulanmagyň ähmiýeti aýratyn nygtaldy.
Çärä talyplar, ýaş telekeçiler hem-de marketing ugruna gyzyklanma bildirýän beýleki gatnaşyjylar işjeň gatnaşyp, özlerini gyzyklandyrýan sowallara jogap aldylar. Açyk sapak bilim alyşmak, tejribe paýlaşmak we täze pikirleri ösdürmek üçin netijeli meýdança boldy.
Bu çäre Türkmenistanyň Bilim ministrligi, S.A. Nyýazow adyndaky Türkmen oba hojalyk uniwersiteti, «Ýaş telekeçiler» merkezi hem-de Türkmenistanyň Magtymguly adyndaky Ýaşlar guramasynyň Maglumat, maslahat beriş we meýletinçilik hereketiniň işleri boýunça Merkezi tarapyndan guraldy.
Guramaçylar şeýle çäreleriň ýaşlaryň bilim derejesini ýokarlandyrmakda, olaryň döwrebap pikirlenişini ösdürmekde hem-de telekeçilik ukyplaryny kämilleşdirmekde möhüm ähmiýete eýedigini bellediler.