Türkmenistanyň Futbol federasiýasynyň FIFA derejeli emini Timur Ramazanow häzirki günlerde Indoneziýada dowam edýän futzal boýunça Aziýa Kubogynyň final tapgyrynyň çäginde geçirilen Ýaponiýa bilen Awstraliýanyň milli ýygyndy toparlarynyň arasyndaky duşuşykda eminlik etdi.
Bu duşuşykda türkmenistanly eminine Bahreýniň FIFA derejeli emini Abdulrahman Al-Doseri ýardam berdi. “C” toparçanyň çäginde geçirilen oýun 6:2 hasabynda Ýaponiýanyň milli ýygyndy toparynyň peýdasyna tamamlandy. Şol toparçanyň beýleki duşuşygynda bolsa Özbegistanyň we Täjigistanyň milli ýygyndy toparlary 0:0 hasabynda deňme-deň oýnadylar.
Ildeşimiz Timur Ramazanow şu gün “A” toparçanyň ikinji tapgyrynyň çäginde Yrak bilen Koreýa Respublikasynyň milli ýygyndy toparlarynyň arasynda geçiriljek duşuşykda üçünji eminiň wezipesini ýerine ýetirer. Şeýle-de bu abraýly ýaryşda Türkmenistanyň Futbol federasiýasynyň hünärmeni Wadim Baratowyň gözegçi emin hökmünde çykyş edýändigini bellemek gerek.
Futzal boýunça 18-nji gezek geçirilýän Aziýa Kubogy 7-nji fewrala çenli dowam eder. Şeýle hem Indoneziýanyň bu yklym ýaryşynyň final tapgyryny eýýäm ikinji gezek kabul edýändigini bellemek ýerliklidir.