Hormatly Prezidentimiz Serdar Berdimuhamedowyň Ýaponiýa amala aşyran saparynyň maksatnamasy baý mazmuny bilen tapawutlanyp, türkmen-ýapon hyzmatdaşlygynyň taryhynda täze sahypany açdy. Bu saparyň çäklerinde köp sanly netijeli duşuşyklar geçirlip, möhüm resminamalara gol çekildi.
Gazanylan ylalaşyklaryň hatarynda Ahal welaýatynda gazdan benzin öndürýän ikinji zawodyň gurulmagy bilen baglanyşyklydyr. Bu babatda «Türkmenhimiýa» döwlet konserni bilen «Kawasaki Heavy Industries, Ltd.» (Ýaponiýa), «Rönesans Endüstri Tesisleri Inşaat Sanayi ve Tijaret Anonim Şirketi» (Türkiýe) we «ITOCHU Corporation» (Ýaponiýa) kompaniýalar toparynyň arasynda Türkmenistanyň Ahal welaýatynda gazdan benzin öndürýän ikinji zawodyň taslamasyny düzmek, üpjün etmek we doly gurup tabşyrmak boýunça hyzmatdaşlyk etmek hakynda Çarçuwaly ylalaşyga gol çekildi.
Mälim bolşy ýaly, Daniýa Patyşalygynyň “Haldor Topsoe” tehnologiýasy esasynda taslamalaşdyrylan dünýäde ilkinji gazdan ekologiýa taýdan arassa benzin öndürýän zawod 2019-njy ýylyň 28-nji iýunynda ulanmaga berlipdi. Bu ýerde her ýylda “mawy ýangyjyň” 1 milliard 410 million kubmetri gaýtadan işlenilýär hem-de ýokary ekologiýa talaplaryna laýyk gelýän ECO – 93 benziniň 600 tonnasy we ugurdaş önümi hökmünde suwuklandyrylan gazyň 115 müň tonnasy, kükürtsizlendirilen dizel ýangyjynyň 12 müň tonnasy öndürilýär.