Petekleriň satuwyna başlanandan soň ilkinji günüň özünde dünýä belli aýdymçy Şakiranyň Bişkekde geçiriljek konsertine 13 müňden gowrak petek satyldy.
Gyrgyz Respublikasynyň Prezidentiň Iş dolandyryş müdirliginiň habar bermegine görä, petekleri dünýäniň 22 ýurdundan raýatlar satyn alýarlar.
«Daşary ýurtly alyjylaryň arasynda Gazagystanyň, Russiýanyň we Özbegistanyň raýatlary agdyklyk edýär» diýlip, habarda bellenilýär.
Prezidentiň Iş dolandyryjysy Kanybek Tumanbaýew halkara çäreleriniň syýahatçylygyň ösmegine ýardam edýändigini, daşary ýurtly myhmanlary özüne çekýändigini we ýerli işewürlik üçin täze mümkinçilikleri döredýändigini belledi.
Belläp geçsek, Şakira 18-nji oktýabrda «Bişkek Arena»da konsert berer. Eksklýuziw ylalaşyga laýyklykda, aýdymçynyň Merkezi Aziýanyň beýleki ýurtlarynda konsertleri geçirilmeýär.