Berkarar döwletiň täze eýýamynyň Galkynyşy döwründe eziz Diýarymyzda halkymyzyň bagtyýar durmuşda ýaşamagy, Watanymyzyň dünýädäki abraý-mertebesiniň beýgelmegi ugrunda uly işler alnyp barylýar. Hormatly Prezidentimiziň parasatly baştutanlygynda döwletimiz tarapyndan öňe sürülýän oňyn başlangyçlaryň we umumadamzat bähbitli teklipleriň dünýä jemgyýetçiliginde giň goldawa eýe bolmagy Wata-nymyzyň şan-şöhratyny has-da belende göterýär.
Ajaýyp zamanamyzda beden we ruhy taýdan sagdyn, watansöýüji, zehinli ýaş nesli terbiýeläp ýetişdirmäge uly üns berilýär. Bu babatda halkymyzyň gadymdan gelýän asylly ýol-ýörelgeleri dowam etdirilip, olar mazmun taýdan has-da baýlaşdyrylýar. Arkadagly Serdarymyz Türkmenistanyň Magtymguly adyndaky Ýaşlar guramasynyň VII gurultaýynda eden taryhy çykyşynda: «Ýaşlar guramasy Watana wepaly nesilleri terbiýelemekde we jebisleşdirmekde, olaryň güýç-kuwwatyny, aň-düşün- jesini Garaşsyz ýurdumyzy ösdürmäge gönükdirmekde öz borjuny üstünlikli ýerine ýetirip gelýär» diýip, guramanyň işine ýokary baha berdi we öňde durýan wezipelerini kesgitledi.
Hormatly Prezidentimiziň parasatly baştutanlygynda ýaşlara döwrebap bilim bermek, bilim ulgamyny barha kämilleşdirmek esasy ugurlaryň birine öwrüldi. Milli ykdysadyýetimiziň ähli pudaklary bilen birlikde, bilim ulgamy uly ösüşlere beslenýär. Häzirki wagtda ýurdumyzyň ähli sebitlerinde mekdebe çenli bilim edaralarynyň, umumy orta bilim berýän mekdepleriň, orta hünär we ýokary okuw mekdepleriniň işi döwrebap alnyp barylýar, sanly ulgamyň mümkinçilikleri giňden ornaşdyrylýar.
Garaşsyz, baky Bitarap Watanymyzyň geljegi bilimli, ylymly, watansöýüji ýaşlara baglydyr. Türkmenistany ösdürmegiň ileri tutulýan ugurlarynyň biri jemgyýetiň ruhy, durmuş-ykdysady we medeni ösüşiniň binýady hökmünde bilim ulgamyny has-da kämilleşdirmekden ybaratdyr. Berkarar döwletiň täze eýýamynyň Galkynyşy döwründe hormatly Prezidentimiz milli bilim ulgamynda oňyn özgertmeleriň üstünlikli durmuşa geçirilmegine möhüm ähmiýet berýär. Şu nukdaýnazardan ýaşlaryň hünär öwrenmegi, ylymly, hünär taýdan kämil bolmaklary ugrunda uly tagallalar edilýär.
Hormatly Prezidentimiz Serdar Berdimuhamedowyň baştutanlygynda ylym-bilim ulgamynda alnyp barylýan özgertmäniň çäginde ýaşlaryň dil baýlygynyň ösdürilmegine uly ähmiýet berilýär. Ähli ýokary okuw mekdeplerinde talyplaryň diňe bir öz hünär ugurlaryny kämilleşdirmegi däl, eýsem dürli dilleri öwrenmegi hem-de olary kämilleşdirmegi ugrunda tagalla edilýär. Munuň üçin ýokary okuw mekdeplerinde degişli kafedralar hereket edýär.
Ýurdumyzda halkara diller bolan iňlis we rus dillerini ylym-bilim ulgamynda öwrenmeklige-de üns artýar. Okuw mekdepleriniň maksatnamalarynda daşary ýurt dillerini işjeň öwrenmek öz mynasyp ornuny tapýar. Elbetde, dilleri öwrenmek üçin döredilýän amatly şertler ýurdumyzyň dünýä bileleşiginde abraýyny artdyrýar, täze-täze ösüşlere badalga berýär.
Daşary ýurt dillerini öwrenmek boýunça ençeme ylmy usullar işlenilip düzüldi we döwrüň ösen mümkinçilikleri esasynda işjeň durmuşa ornaşdyrylýar. Dil aragatnaşyk serişdesi bolmak bilen, adamlaryň durmuşynda möhüm bolup durýar. Şonuň üçin hem häzirki wagtda dil öwrenmek, bilim almak esasy ugurlaryň biridir.
Dünýä dilleriniň ähmiýetine düşünip, bu günki ýaşlar dilleri yzygider öwrenýärler. Çünki dünýä dillerini öwrenmek üçin diňe dilçi bolmak wajyp däldir. Ylym bilen meşgullanýan ýa-da hünärini kämilleşdirip, öňdebaryjy pikirlere eýerýän her bir adam dünýä dillerini bilmäge ýykgyn edýär. Şonuň üçin hem dil biliminiň, dil öwrenmegiň ähmiýeti has-da artyp, her birimiziň ünsümizi özüne çekýär.
Häzirki döwürde ýurdumyzda bazar ykdysadyýeti ulgamyndaky amala aşyrylýan özgertmeler, dünýäniň ösen ýurtlary bilen halkara gatnaşyklaryň barha kämilleşmegi talyplara saýlap alan hünäri bilen baglylykda ykdysady, bazar ykdysadyýeti bilen baglanyşykly sözleri we adalgalary ýörite öwretmek zerurlygyny ýüze çykardy. Daşary ýurt dillerini öwrenmekde talyplaryň özbaşdaklygy we jogapkärçiligi aýratyn möhümdir. Dil öwrenmek talyplara öz hünär ugurlary boýunça halkara tejribelerini içgin öwrenmäge, şahsy gyzyklanmalaryny artdyrmaga we öz-özüne baha bermek, öz-özüni düzetmek düşünjelerini öwrenmäge ýardan edýär. Häzirki zaman ýokary biliminde daşary ýurt dili geljekki hünärmenleriň hünär taýýarlygynyň aýrylmaz bölegi hasaplanýar.
Nurgeldi Bugraýew,
Ýagşygeldi Kakaýew adyndaky Halkara nebit we gaz uniwersitetiniň
Nebit-gaz fakultetiniň Diller kafedrasynyň uly mugallymy.