Şu günler Fransiýanyň paýtagty Pariž şäheriniň wakalarynyň esasyny Argentinanyň meşhur futbolçysy Lionel Messi düzýär. Ispaniýanyň “Barselona” toparyny terk edip, Fransiýanyň “Pari-San-Žermen” (PSŽ) topary bilen 2+1 ýyllyk şertnama baglaşan Messiniň futbol köýnekçeleriň satuwynyň birinji tapgyry 20 minudyň dowamynda satylyp gutardy. Köýnekçeler 108 ýewrodan satyldy.
Onuň “30” belgili futbol köýnekçesini satyn almak üçin janköýerler nobata durýarlar. Şeýle hem Messiniň gatnaşmagynda toparyň “Park de Prens” stadionyndaky futbol duşuşygyna petek satyn aljaklaryň sany hem köpelmese azalanok. Bu hem toparyň ýolbaşçylaryna stadionyň geriminiň giňeldilmegine getirip biler.
Entek Messi gelmänkä, ýurduň milli çempionatynyň çäklerinde “PSŽ” topary bilen “Strasburg” toparynyň arasynda “Park de Prens” stadionynda oýnaljak duşuşygyň petekleri satylyp gutardy. Häzirki wagtda stadionyň iň bir amatly bolmadyk ýerindäki orun üçin hem petegiň bahasy 450 ýewro çykdy. Iň gowy ýerleri 1 müň ýewrodan satýarlar.
“Park de Prens” stadiony 1897-nji ýylda guruldy we ilkibaşda ol welodrom (welosiped ýaryşlary) üçin ulanyldy. 1972-nji ýylda täzeden gurnalyp, onuň tomaşaçylarynyň sany 49,5 müňe ýetirildi.
Toparyň ýolbaşçysy katarly işewür Nasser Al-Helaifi dünýä derejesindäki topar üçin stadionyň kiçi bolup galýandygyny, onuň gerimini giňeltmegi maksat edinýändiklerini we Pariž şäheriniň häkimi Ann Idalgonyň munuň üçin razyçylyk berendigi aýdyldy.
“PSŽ” TOPARY KABIR FUTBOLÇYLARY BILEN HOŞLAŞMALY BOLAR
“PSŽ” topary şu möwsümde 5 sany uly transferi amala aşyrdy. Ýewropa çempionatynyň ýyldyzy italiýaly derwezean Janluiji Donnaruma, “Real Madrid” toparynyň ozalky kapitany Serhio Ramos, “Liwerpul” toparynyň ozalky kapitany Jorjinio Weýnaldum, “Inter” toparynyň goragçysy Aşraf Hakimi we Lionel Messi. Aşraf Hakimiden galan hemmesi erkin futbolçy hökmünde geldi.
Topar zähmet haklary tertipleşdirmek üçin käbir futbolçylary bilen hoşlaşmaly bolar. Mauro Ikardi, Andera Errera, Rafinýa, Tilo Kerera, Idrissy Guýe we Abdu Diallo ýaly futbolçylar iberilip bilner.
TOPARDA IŇ KÖP HAKY MESSI ALAR
“Le Parisien” neşiriniň habaryna görä, toparda iň köp zähmet hakyny Lionel Messi alar. Ol 2 ýylda fransuz toparyndan 120 million ýewro gazanar.
Topar Messä gol çekendigi üçin 40 million ýewro, ýyllyk zähmet haky üçin 41 million ýewro tölär. Eger topar Çempionlar ligasynyň kubogyny gazanan ýagdaýynda ýa-da Messiniň ýene-de “Altyn pökgi” baýragyna eýe bolan gazanan halatynda futbolça goşmaça hak tölär.
Şeýlelikde, Messi toparyň iň köp hak tölenýän futbolçy bolar. Ol bu babatda Neýmardan we Kilian Mbappeden öňe geçer. Neýmar ýyllyk 36.8 million ýewro, Mbappe bolsa 25 million ýewro gazanýar.
Galyberse-de, Messi Fransiýanyň çempionatynda taryhynda iň ýokary zähmet hakly futbolçy bolar.