2026-njy ýylyň 24-25-nji maýynda Belarus Respublikasynyň Söwda-senagat edarasynyň Minsk bölüminiň ýolbaşçylygyndaky işewürler wekiliýeti Türkmenistanyň Söwda-senagat edarasynda ýaýbaňlandyrylan «Ak şäherim Aşgabat» atly XXV halkara serginiň we maslahatyň işine işjeň gatnaşdylar. Myhmanlar sergi-ýarmarkada ýaýbaňlandyrylan diwarlyklar bilen tanyşyp, çäräniň guramaçylyk derejesine ýokary baha berdiler.
Halkara serginiň we maslahatyň çäklerinde ýurdumyzyň Söwda-senagat edarasynyň belarusly kärdeşleri bilen türkmen işewür toparlarynyň arasynda B2B görnüşinde göni gepleşikler geçirildi. Dostlukly ýurduň işewür wekiliýeti ykdysadyýetiň dürli pudaklarynda iş alyp barýan täze kompaniýalarynyň ençemesiniň sazlaşykly ösýän türkmen bazaryna uly gyzyklanma bildirýändigini bellediler.
Gepleşiklerde türkmen tarapy bilen geljegi uly hyzmatdaşlygyň ugurlary barada giňişleýin gürrüň etdiler. Esasan hem söwda we ykdysady, senagat we gurluşyk, saglygy goraýyş ulgamynda hyzmatdaşlygy has-da işjeňleşdirmek babatda pikir alşyldy. Şeýle-de taraplar bilelikdäki taslamalary durmuşa geçirmegiň geljegini ara alyp maslahatlaşdylar.
Belarusyň işewür wekiliýeti türkmen tarapyna görkezilen myhmansöýerlik we ikitaraplaýyn hyzmatdaşlyga berilýän goldaw üçin tüýs ýürekden hoşallyk sözlerini beýan etdiler.