ABŞ-nyň NASA edarasynyň iberen marsahodyndan soňra Hytaý hem Marsa üstünlikli gonmagy başardy. Bu barada Hytaý milli kosmos edarasy habar berýär.
Bu barada berlen beýanata görä, Hytaýyň Mars planetasyny öwrenmek üçin iberen “Týanwen-1” kosmos gämisi gonduryldy. Bu Hytaýyň kosmos enjamynyň başga bir planeta gonan ilkinji gämisi boldy. Hytaý marsohody Mars planetasynyň demirgazyk ýarymşaryndaky Utopiýa düzlügine gondy. Gyzyl planetanyň şu böleginde suwuň çykýandygy çaklanylýar.
“Týanwen-1” awtomatiki planetalar stansiýasy, Hytaýyň günortasyndaky Haýnan welaýatynda ýerleşýän Wençang kosmodromyndan “Çançžen-5” raketa göterijisiniň kömegi bilen 2020-nji ýylyň 23-nji iýulynda uçurylypdy. Fewral aýynda ol Marsyň orbitasyna çykdy.
“Týanwen-1” planetalar stansiýasynyň umumy agramy 5 tonna ýetýär, onuň 1,3 tonnasy marsohod gämisine degişli, orbital stansiýanyň agramy bolsa 3,7 tonnadyr.
“Týanwen 1” missiýasy 13 sany ylmy gural bilen enjamlaşdyrylandyr. Orbital modulda ortaça çözgüdi (100 metre çenli) kamera, ýokary çözgüdi (0,5 metre çenli) kamera, topragyň tektoniki düzümini öwrenmek üçin ýerasty radar, mineral düzümini öwrenmek üçin spektrometr bar.