Şu gün Aşgabatda ýerleşýän «Halk hakydasy» ýadygärlikler toplumynda türkmen halkynyň Milli Lideri, Türkmenistanyň Halk Maslahatynyň Başlygy we Türkmenistanyň Prezidenti agzaçar sadakasyny berdiler. Oňa ýurduň müftüsi, ähli welaýatlaryň, Aşgabat hem-de Arkadag şäherleriniň ymamlary hormatly ýaşulylar, dili senaly eneler we köpsanly ýaşlar gatnaşdylar. Bu barada «Watan» habarlar gepleşiginde habar berildi.
Hajy Arkadag Gurbanguly Berdimuhamedow mübärek Oraza aýynyň mukaddes Gadyr gijesiniň öňüsyrasynda il bolup, agzybirlikde agzaçar sadakasyny bermegiň sogap işdigini belläp, aýat-töwirleriň okalýandygyny, Beýik Biribardan ýagşy dilegleriň edilýändigini aýtdy. «Halkymyzyň doga-dilegleri, berýän sadakalary Allatagallanyň dergähinde kabul bolsun!» diýip, hajy Arkadag aýtdy.
Türkmenistanyň müftüsi tebärek çykyp, hajy Arkadagyň hem-de Arkadagly hajy Serdaryň berýän agzaçar sadakalarynyň Beýik Biribaryň dergähinde kabul bolmagyny dileg etdi. Tebärek çykylandan soňra, agzaçar sadakasyna gatnaşýanlara dürli tagamlar çekildi.