Gruziýanyň Parlamentiniň Başlygy Şalwa Papuaşwili, resmi sapar bilen Gruziýada bolýan Türkmenistanyň Mejlisiniň Başlygy Dünýägözel Gulmanowa bilen duşuşdy.
Duşuşygyň dowamynda Türkmenistanyň Mejlisiniň Başlygynyň Gruziýa ilkinji saparydygy nygtaldy hem-de bu saparyň Gruziýa bilen Türkmenistanyň arasyndaky ikitaraplaýyn hyzmatdaşlygy mundan beýläk ösdürmek üçin möhüm ähmiýete eýedigi bellenildi.
Taraplar Gruziýa bilen Türkmenistanyň arasyndaky gatnaşyklaryň soňky ýyllarda ýokary derejeli saparlaryň geçirilmegi netijesinde üstünlikli ösdürilýändigini bellediler.
Duşuşykda syýasy derejedäki ikitaraplaýyn gatnaşyklar, şeýle hem ykdysadyýet, ulag, syýahatçylyk we medeniýet ulgamlaryndaky hyzmatdaşlyk meseleleri ara alnyp maslahatlaşyldy.
Parlamentara hyzmatdaşlyga aýratyn üns berildi. Sapar çäklerinde Gruziýanyň Parlamenti bilen Türkmenistanyň Mejlisiniň arasynda hyzmatdaşlyk boýunça ylalaşyga gol çekildi. Bu ylalaşyk parlamentara gatnaşyklary, aýratyn-da dostluk toparlarynyň, pudaklaýyn komitetleriň, ýaş parlamentarileriň, zenan parlamentarileriň hem-de parlament dolandyryş edaralarynyň arasyndaky gatnaşyklary berkitmek arkaly ösdürmäge gönükdirilendir.
Şalwa Papuaşwili Gruziýanyň strategik ulag geçelgeler zynjyrynda möhüm orun eýeleýändigini we özara arabaglanyşyklary ösdürmek ugrunda Türkmenistan bilen hyzmatdaşlyk etmäge taýýardygyny aýtdy.
Dünýägözel Gulmanowa Türkmenistanyň Gruziýanyň döwlet garaşsyzlygyny we çäk bitewiligini berk goldaýandygyny belledi. Şeýle-de ol Gruziýa tarapyna Türkmenistanyň hemişelik Bitaraplygyny goldaýandygy üçin minnetdarlyk bildirdi.