Gazagystanyň daşary işler ministri Murat Nurtleu Ženewa şäherinde BMG-niň baş sekretary Antoniu Guterriş bilen duşuşyp, Gazagystanyň Prezidenti Kasym-Žomart Tokaýewiň şu ýylyň iýulynda geçiriljek Şanhaý Hyzmatdaşlyk Guramasynyň sammitine gatnaşmak baradaky çakylygyny gowşurdy. Bu barada Gazagystanyň daşary syýasat edarasy habar berýär.
– Duşuşykda Merkezi Aziýa ýurtlarynyň arasyndaky sebit hyzmatdaşlygy, Almaty şäherinde Merkezi Aziýa we Owganystan üçin BMG-niň durnukly ösüş üçin sebit merkezini döretmek başlangyjy ara alnyp maslahatlaşyldy – diýip, metbugat beýanatynda habar berilýär.
Guterriş çakylyk üçin minnetdarlyk bildirip, Gazagystanyň durnukly ösüşi ilerletmek ugurndaky tagallalaryna ýokary baha berdi.
2023-2024-nji ýyllarda Gazagystan Şanhaý Hyzmatdaşlyk Guramasyna başlyklyk edýär. 2001-nji ýylyň 15-nji iýunda Şanhaýda döredilen bu gurama Russiýa, Gazagystan, Gyrgyzystan, Hytaý, Täjigistan we Özbegistan agza. 2017-nji ýylda olaryň arasyna Hindistan we Pakistan, 2023-nji ýylda bolsa, Eýran goşuldy. Belarusyň hem bu gurama agza bolmagy üçin degişli işler tamamlaýjy tapgyrda alnyp barylýar.