Şu gün Özbegistanyň Samarkant şäherinde Türki Döwletleriň Guramasyna (TDG) agza we synçy döwletleriň daşary işler ministrleriniň geňeşiniň mejlisi geçirildi. Oňa Türkmenistanyň daşary işler ministriniň orunbasary Berdiniýaz Mätiýew ýurdumyza wekilçilik edýär.
Özbegistanyň metbugatynyň habaryna görä, Özbegistanyň daşary işler ministri Wladimir Norowyň ýolbaşçylygynda geçýän duşuşyga Türkiýäniň daşary işler ministri Mewlüt Çawuşogly, Gazagystanyň daşary işler ministri Muhtar Tleuberdi, Gyrgyzystanyň daşary işler ministri Žeenbek Kulubaýew, Azerbaýjanyň daşary işler ministriniň orunbasary Halaf Halafow, Wengriýanyň daşary işler ministri Piter Siýýarto we Türki Döwletleriň Guramasynyň baş sekretary Bagdad Amraýew gatnaşdy.
Şeýle hem bu duşuşyga birnäçe halkara guramalaryň hem-de Türki Döwletleriň Guramasynyň düzümindäki guramalaryň ýolbaşçylary hem gatnaşdy.
Türki Döwletleriň Guramasyna (TDG) agza we synçy döwletleriň daşary işler ministrleriniň geňeşiniň mejlisinde ertir geçiriljek Türki Döwletleriň Guramasyna (TDG) agza we synçy döwletleriň Baştutanlarynyň sammitiniň gün tertibindäki meseleler we gol çekilmegi göz öňünde tutulýän resminamalar boýunça pikir alşyldy.