Şu gün Türkmenistanyň Prezidenti Serdar Berdimuhamedowy Türkmenistanyň döwlet sylagy – “Arkadag” medaly bilen sylaglamak dabarasy geçirildi. Oňa Türkmenistanyň Ministrler Kabinetiniň Başlygynyň orunbasarlary hem-de harby-hukuk edaralaryň ýolbaşçy;ary gatnaşdy.
Dabarada Türkmenistanyň Mejlisiniň Başlygy Dünýägözel Gulmanowa Türkmenistanyň Prezidentini “Arkadag” medaly bilen sylaglamak baradaky Türkmenistanyň Mejlisiniň Kararyny okady.
Soňra Türkmenistanyň Prezidentine bu abraýly döwlet sylagy dabaraly ýagdaýda gowşuryldy. Döwlet Baştutanymyz özüne gowşurylan döwlet sylagy bolan “Arkadag” medaly üçin minnetdarlyk bildirdi. Hormatly Prezidentimiz bu sylagy milli däplerimiz esasynda alyp barýan sahawatly işlerimize berlen baha diýip hasap edýändigini belledi.
Türkmenistanyň «Arkadag» medaly adam bähbitlerini ileri tutmak, olaryň mertebesini belende götermek bilen, adalatlylyk, adamkärçilik, ynsanperwerlik, ýokary ahlaklylyk, haýyr-sahawatlylyk, hemaýata mätäçlere kömek bermek ýaly türkmeniň ata-baba ýol-ýörelgelerine, milli däplerine laýyklykda we meýletinlik esasda döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ynsanperwer başlangyçlaryny, bitiren hyzmatlaryny hormatlamak, toplan tejribesini, ösýän halkara abraýyny giňden goldamak, bu ugurda görnükli işleri bitiren ýurdumyzyň raýatlaryny sylaglamak maksady bilen döredildi.