27-nji sentýabrda Türkmenistanyň Garaşsyzlyk güni mynasybetli Türkiýe Respublikasynyň paýtagty Ankara şäheriniň iň uly binasy ýüzi ýurdumyzyň Döwlet baýdagynyň şekiline beslendi. Örän täsirli görnüş beýikligi 140 metrlik binany türkmen gölleri we bäşýyldyzly ýarymaýy şekili bilen öwüşgin atýan al-ýaşyl sütüne öwürdi. Munuň özi dostlugyň we doganlygyň özboluşly hem-de aýdyň alamaty boldy. Bu barada Türkmenistanyň Türkiýe Respublikasyndaky ilçihanasy habar berýär.
Ankara şäherindäki iň uly binalaryň biri bolan Türkiýäniň Palatalar we biržalar edarasynyň (TOBB) binasy türkmen ýaşyl tugy bilen bezeldi. Munuň 27-nji sentýabrda amala aşyrylmagy Türkmenistanyň mukaddes Garaşsyzlygynyň 32 ýyllyk şanly toýunyň ýatlanyp geçilmegi bilen alamatlandyryldy.
Türkiýäniň Palatalar we biržalar edarasynyň (TOBB) binasy 140 metr beýiklikde bolup, ol Ankaranyň iň beýik binalarynyň biridir we Türkiýäniň işewürlik merkezidir.
Bu bina 2001-nji ýylda guruldy we dünýäniň öňdebaryjy kompaniýalary bilen işewürlik gatnaşyklary ösdürmek babatda tagallalaryň merkezi boldy.
Şeýle hem 27-nji sentýabrda BAE-niň Dubaý şäherindäki dünýäniň iň beýik binasy bolan «Burj Halyfa» binasynyň ýüzi ýurdumyzyň Döwlet baýdagynyň şekiline beslendi.
Mundan başga-da, ABŞ-nyň Nýu-Ýork şäheriniň meşhur “Taýms” meýdanynda Türkmenistan tanyşdyryldy.
Şeýle ajaýyp wakalaryň ýene-de biri Birleşen Arap Emirlikleriniň Abu-Dabi şäherinde hem bolup geçdi. Bu şäherdäki “ADNOC” milli nebit kompaniýasynyň binasy türkmen baýdagy bilen bezeldi.
Bu ajaýyp wakalar Türkmenistanyň Garaşsyzlyk gününiň tutuş dünýäde giň gerimde bellenilip hem-de ýatlanylyp geçilendiginiň nobatdaky subutnamasydyr.