Her ýylda geçirilýän küşt ýaryşy bu ýyl hem, ýaňy ýakynda Ýöriteleşdirilen küşt we şaşka mekdebinde 20 ýaşa çenli gyz-oglan aýratynlykda Türkmenistanyň birinjiligi geçirildi. Bu bäsleşige ýurdumyzyň ähli welaýatlarynda ezber küştçi ýaş türgenler gatnaşdylar. 9 tapgyrdan ybarat bolan bu ýaryşa jemi 18 gyz we 16 oglan gatnaşyp öz başarnyklaryny görkezdiler. Gyzlaryň arasynda I orny Lebap welaýatynyň Dänew etrabynyň 31-nji orta mekdebiniň 7 synp okuwçysy Lala Şöhradowa eýelemegi başardy. Ol Lebap welaýatynyň Boýnuzyn etrabynyň 6-njy sport mekdebiniň tälimçisi Halil Kurbandurdyýewden tälim alýar. Lala hem, birnäçe gezek öz deň-duşlarynyň arasynda ýeňiji bolmagy başarypdy. FIDE-niň ussady bolan Lala 2019-njy ýylyň iýun aýynda Özbegistan Respublikasynyň Daşkent şäherinde geçirilen mekdep okuwçylarynyň arasynda küşt ýaryşy boýunça Aziýa çempionatynda 13 ýaşly gyzlaryň arasyndaky bäsleşikde bir altyn we kümüş medal gazanmagy başarypdy.
II orna bolsa, Aşgabat şäheriniň 52-nji orta mekdebiniň 10 synp okuwçysy Aýşe Gubataýewa mynasyp boldy. 2019-njy ýyl Aýşe üçin ütünliklere baý bolan ýyl boldy. Ol bu gezekki ýaryşda ýokary ligada çykyş edip, Türkmenistanyň milli ýygynda toparyna düşmegi başardy. Aşgabat şäheriniň 55-nji orta mekdebiniň 7 synp okuwçysy Merýem Agajanowa hem III orny eýelemegi başardy. II we III oruny eýelän gyzlarymyz Aşgabat şäheriniň Ýöriteleşdirilen küşt we şaşka mekdebiniň hem-de Türkmenistanyň ýaşlar ýygyndy toparynyň baş tälimçis Serdar Annaberdiýewden tälim alýarlar.
Oglanlardan bolsa, I orna Aşgabat şäheriniň 50-nji orta mekdebiniň 10 synp okuwçysy Azat Nurmämmedow mynasyp boldy. Ol eýýäm 12-nji gezek ýaşlar we ýetginjekleriň arasynda Türkmenistanyň birinjiligini elden bermän gelýär. FIDE-niň ussady we milli ýygyndy toparynyň agzasy bolan Azat diňe bir ýurdumyzda ýeňiji bolmak bilen çäklenmän, ol halkara ýaryşlarda hem birnäçe baýrakly orunlary eýeläp gelýärOl hem Aşgabat şäheriniň Ýöriteleşdirilen küşt we şaşka mekdebiniň hem-de Türkmenistanyň at gazanan tälimçisi Serdar Annaberdiýewden tälim alýar we eýýäm 6 ýyl bäri küşdüň inçe syrlaryny öwrenip gelýär. Lebap welaýatynyň 33-nji orta mekdebiniň 8 synp okuwçysy Halyniýazow Wepala-da bu ýaryşda II orny almak başartdy. Ol Lebap welaýatynyň Türkmenabat şäheriniň 13-nji sport mekdebiniň tälimçisi Güljahan Öwlýakuliýewadan tälim alýar. III orna bolsa, Aşgabat şäheriniň 60-njy orta mekdebiniň 10 synp okuwçysy Şirliýew Allaýar mynasyp boldy. Onuň tälimçisi Şaniýaz Annaniýazowdyr.
Şeýlelikde, Aşgabat şäheriniň sport we ýaşlar syýasaty Baş Müdirliginiň Ýöriteleşdirilen küşt-şaşka mekdebiniň türgenleri toparlaýyn hasapda 1 gyzyl, 2 bürünç we 1 sany kümüş medal bilen I bolmagy başardylar.
Aýşirin ALYÝEWA
Halkara ynsanperwer ylymlary we ösüş uniwersitetiniň Žurnalistika hünäriniň 3 ýyl talyby