2026-njy 14-15-nji maýy aralygynda Türkmenistanyň wekiliýeti Russiýa Federasiýasynyň Kazan şäherindäki “KazanExpo” halkara sergi merkezinde geçiriljek “Russiýa-Yslam dünýäsi: KazanForum 2026” XVII Halkara ykdysady forumyna gatnaşar.
Bu iri halkara çäre Russiýa Federasiýasy bilen Yslam Hyzmatdaşlyk Guramasyna agza ýurtlaryň arasynda hyzmatdaşlygy ösdürýän abraýly meýdança hökmünde giňden ykrar edilýär.
“Russiýa-Yslam dünýäsi: KazanForum 2026” XVII halkara ykdysady forumynyň çäklerinde söwda, maýa goýum, energetika, ulag-logistika, sanly tehnologiýalar, saglyk, gurluşyk, dokma, medeniýet we syýahatçylyk ýaly ugurlar boýunça maslahatlar hem-de iş duşuşyklary geçiriler. Bu bolsa gatnaşyjy ýurtlaryň arasynda täze taslamalaryň durmuşa geçirilmegine giň ýol açýar.
Şeýle hem forumyň çäklerinde geçiriljek “Russiýa-Yslam dünýäsi Hyzmatdaşlyk Expo” atly sergide Türkmenistanyň Milli pawilýony görkeziler. Milli pawilýony ýokary derejesinde taýýarlamak we many-mazmun taýdan baýlaşdyrmak boýunça jogapkärçilik Türkmenistanyň Söwda-senagat edarasy tarapyndan amala aşyrylýar.
Türkmenistanyň bu foruma gatnaşmagy milli ykdysadyýetimiziň kuwwatyny, eksport mümkinçiliklerini hem-de ýurdumyzda döredilen amatly maýa goýum şertlerini halkara jemgyýetçiligine tanyşdyrmakda möhüm ähmiýete eýe bolar. Şeýle hem bu çäre täze hyzmatdaşlyga, söwda dolanyşygynyň artmagyna hem-de özara bähbitli gatnaşyklaryň giňelmegine uly itergi berer.