26-njy fewralda paýtagtymyzdaky «Watan» kinokonsert merkezinde Türkmenistanyň Bilim ministrliginiň, Türkmenistanyň Saglygy goraýyş we derman senagaty ministrliginiň, Türkmenistanyň Kärdeşler arkalaşyklarynyň Milli merkeziniň, Türkmenistanyň Zenanlar birleşiginiň Merkezi Geňeşiniň, Türkmenistanyň Magtymguly adyndaky Ýaşlar guramasynyň Merkezi Geňeşiniň we I.Gandi adyndaky Aşgabat lukmançylyk orta hünär okuw mekdebiniň bilelikde guramagynda Halkara zenanlar güni mynasybetli Arkadag, Aşgabat şäherleriniň we Ahal welaýatynyň orta hünär okuw mekdepleriniň talyp gyzlarynyň arasynda geçirilen «Talyp gözeli — 2025» edebi-döredijilik bäsleşiginiň jemleýji tapgyry geçirildi.
«Milli — buýsanjym, başlara göwher täjim» ady bilen geçirilen bäsleşige ýurdumyzyň orta hünär okuw mekdeplerinden jemi 20 gyz gatnaşyp, özleriniň hünärlerini wasp etmek, keşde çekmek we çeper okaýyş boýunça çykyş etdiler.
Gyzgalaňly geçen bäsleşikde Baş baýraga I.Gandi adyndaky Aşgabat lukmançylyk orta hünär okuw mekdebiniň talyby Käbe Hydyrowa, I orna Neşirýat-çaphana orta hünär okuw mekdebiniň talyby Aýsoltan Kakabaýewa, II orna Aman Kekilow adyndaky mugallymçylyk mekdebiniň talyby Nurjemal Täçmämmedowa we Türkmenistanyň Gahrymany Atamyrat Nyýazow adyndaky Ýöriteleşdirilen bank mekdebiniň talyby Jemal Täjiýewa, III orna bolsa Aşgabat şäheriniň syýahatçylyk orta hünär okuw mekdebiniň, Türkmen döwlet medeniýet we sungat mekdebiniň we Ahal welaýat ýörite sungat mekdebiniň talyp gyzlary mynasyp boldular. Ýeňiji bolan talyplara bäsleşigi gurnaýjylar tarapyndan Hormat hatlary we ýadygärlik sowgatlar gowşuryldy.