Türkmenistanyň bilim ministri Jumamyrat Gurbangeldiýew bilen Türkiýe Respublikasynyň milli bilim ministri Ýusuf Tekiniň başlyklyk etmeginde Ankara şäherinde bilim ulgamynda hyzmatdaşlyk etmek baradaky türkmen-türk geňeşiniň 4-nji mejlisi geçirildi. Bu barada Türkiýäniň Milli bilim ministrliginiň resmi saýtynda habar berilýär.
Iki ýurduň arasynda ozal gazanylan ylalaşyklaryň netijesinde bilim ulgamyndaky hyzmatdaşlykda uly üstünlikleriň gazanylandygyny bellän türk ministri Türkiýede 30 müň töwereginde türkmen ýaşlarynyň bilim alýandygyny belledi.
Türkiýäniň milli bilim ulgamynda gazanan üstünlikleri barada belläp geçen ministr Ýusuf Tekin Türkmenistan bilen bilim ulgamyndaky hyzmatdaşlygy ösdürmäge taýýardyklaryny mälim etdi.
Türkmenistanyň bilim ministri Jumamyrat Gurbangeldiýew türkmen wekiliýetine görkezilen myhmansöýerlik üçin minnetdarlyk bildirip, iki ýurduň arasyndaky bilim ulgamyndaky hyzmatdaşlygyň ähmiýetini belledi.
Türkmenistanyň bilim ministri aprel aýynda Türkmenistanda geçiriljek halkara matematika olimpiadasyna türk mekdep okuwçylaryny gatnaşmaga çagyrdy.
Şeýle hem türkmen tarapy bilim ulgamynda täze ylalaşyklaryň gazanylmagy we durmuşa geçirilmegi babatda hyzmatdaşlyk etmäge taýýardyklaryny belledi.