Şu ýylyň 23-24-nji noýabrynda Täjigistanyň Duşenbe şäherinde söwda-ykdysady we ylmy-tehniki hyzmatdaşlyk boýunça bilelikdäki türkmen-täjik hökümetara toparynyň 12-nji mejlisi geçiriler. Bu barada Täjigistanyň resmi habarlar gullugy habar berýär.
Türkmenistan bilen Täjigistanyň arasyndaky söwda-ykdysady hyzmatdaşlygy ösdürmek hem-de hökümetara toparynyň işini işjeňleşdirmek Türkmenistanyň Prezidentiniň sentýabr aýynda Duşenbe şäherinde geçirilen Merkezi Aziýanyň döwlet Baştutanlarynyň Konsultatiw duşuşygynyň çäklerinde Täjigistanyň Prezidenti Emomali Rahmon bilen geçiren gepleşiklerinde ara alnyp maslahatlaşylan esasy ugurlaryň biri boldy.
Şol duşuşykda taraplar söwda-ykdysady hyzmatdaşlygy ösdürmek, şol sanda haryt dolanyşygynyň möçberini artdyrmak, medeni-ynsanperwer gatnaşyklary giňeltmek babatda hem pikir alyşdylar.