Günorta-Gündogar Aziýanyň öňdebaryjy ýurtlaryndan Indoneziýada ilkinji ýokary tizlikli otly gatnawy ýola goýuldy. Ýurduň Prezidenti Joko Widodo ýokary tizlikli demirýol gatnaw ugrunyň açylyş dabarasyna gatnaşdy. Bu taslama Günorta-Gündogar Aziýadaky ilkinji ýokary tizlikli otly taslamasydyr.
Taslamanyň bahasy 7.3 milliard dollara barabar bolup, onuň köp bölegi Hytaý tarapyndan maliýeleşdirildi.
– Jakarta-Bandung aralygyndaky ýokary tizlikli otly – Indoneziýadaky we Günorta-Gündogar Aziýadaky ilkinji ýokary tizlikli otludyr. Onuň tizligi sagatda 350 kilometre deňdir – diýip, Prezident Widodo açylyş dabarasynda belläp geçdi.
Ýokary tizlikli otly gatnaw ugry 142 kilometre deňdir. Ýurduň paýtagty Jakarta bilen Bandung şäherleriniň arasyndaky ýoluň wagty 3 sagatdan 40 minuta çenli tygşytlanýar. Şeýle hem bu otly uglerod zyňyndylarynyň hem azaldylmagyna ýardam eder.
Taslamanyň durmuşa geçirilmegi üçin “PT Kereta Cepat Indonesia-China” kompaniýasy çykyş etdi. Ol Indoneziýanyň 4 sany iri döwlet kompaniýays bilen Hytaýyň iri “China Railway International Co. Ltd” kompaniýasynyň bilelikde döreden konsorsiumyndan ybaratdyr.
Umuman, bu demir ýoluň gurluşygy dolulygyna Hytaýyň tehnologiýasy hem-de enjamlary esasynda amala aşyryldy.