Aziýanyň Futbol Konfederasiýasynyň Çempionlar ligasynda toparçalardaky 2-nji tapgyryň duşuşyklary geçirilýär. Bu ýaryşda ýurdumyza wekilçilik edýän “Ahal” topary özüniň ikinji duşuşygyna çykýar.
Ilkinji duşuşykda Saud Arabystanynyň “Al-Feýha” toparyny 1:0 hasabynda ýeňen “Ahal” Çempionlar ligasyndaky ikinji duşuşygyny myhmançylykda geçirer. Ýurdumyzyň güýçli toparynyň nobatdaky garşydaşy Birleşen Arap Emirlikleriniň “Al-Aýn” toparydyr.
BAE-niň “Al-Aýn” topary bu ýaryşdaky ilkinji duşuşygynda Özbegistanyň “Pahtakor” toparyny 3:0 hasabynda ýeňipdi.
“Ahal” topary bilen “Al-Aýn” toparynyň arasyndaky duşuşyk şu gün, ýagny 3-nji oktýabrda Aşgabat wagty bilen 21:00-da başlaýar.
Şeýle hem Aziýanyň Futbol Konfederasiýasynyň Çempionlar ligasynda gyzykly duşuşyklar dowam edýär. Dünýä belli ýyldyz futbolçy Kristiano Ronaldo Aziýanyň Çempionlar ligasynda ilkinji goluny geçirdi. Onuň düzüminde çykyş edýän “Al-Nasr” topary 2 tapgyrda Täjigistanyň “Istiklol” toparyny 3:1 hasabynda utdy. Şol duşuşykda portugal futbolçy 66-njy minutda tapawutlandy.
Ronaldo bu barada özüniň jemgyýetçilik torunda şeýle diýdi:
– Ähli topar üçin gowy duşuşyk boldy. Aziýanyň Çempionlar ligasynda ilkinji golumy geçirendigime begenýarin. Biz ýeňiş gaznamagy dowam edýäris!