Russiýa Federasiýasynyň Moskwa oblastynyň Krasnogorsk şäheriniň «Vegas City Hall» konsert merkezinde ýurdumyzyň meşhur estrada aydymçysy Azat Dönmezowyň hem-de türkmen sungat ussatlarynyň konserti boldy. Bu barada Türkmenistanyň Russiýadaky ilçihanasynyň resmi saýtynda habar berildi.
Oňa Russiýanyň ýokary okuw mekdeplerinde okaýan türkmen talyplary, bu ýerdäki diplomatik gulluklaryň wekilleri hem-de beýleki hormatly myhmanlar gatnaşdylar.
Türkmen aýdymçylarynyň Moskwadaky konsertiniň özi seýrek ýagdaýdyr we şonuň üçin oňa isleg barha ýokarydyr. Birnäçe ýyl bäri Türkmenistandan ajaýyp döredijilik toparlary Russiýa diňe Medeniýet günleriniň çäginde geldi. Şeýle-de bolsa, medeni we ynsanperwer ugurda ikitaraplaýyn gatnaşyklary ösdürmek has-da işjeňleşdirildi.
Türkmen estrada sungatynyň Moskwanyň sahnasyndaky çykyşy örän uly gyzyklanma döretdi. Türkmenistanda uly meşhurlykdan peýdalanýan Azat Dönmezow öz aýdymlary bilen tomaşaçylary haýrana goýan bolsa, deprek çalmakda meşhurlyk gazanan Atajan Eýýubowyň, üflenip çalynýan halk saz guraly bolan türkmen tüýdügini çalmagyň ussady Serdar Haýdarowyň, şeýle hem Kerim Ylýasowyň ýolbaşçylygyndaky «Güneş» aýdym-saz toparynyň ajaýyp we gaýtalanmajak çykyşlary tomaşaçylaryň gyzgyn söýgüsine mynasyp boldy.