Mälim bolşy ýaly, Türkmenistanyň Prezidenti Gurbanguly Berdimuhamedow 12-nji fewralda Hökümetiň 2020-nji ýylda hem-de şu ýylyň ýanwar aýynda ýerine ýetirilen işleriniň jemine bagyşlanyp geçirilen, giňişleýin mejlisinde degişli Karara gol çekip, Türkmenistanyň Garaşsyzlygynyň şanly 30 ýyllygy, baky Bitaraplygynyň 25 ýyllygy, şeýle hem 2021-nji ýylyň «Türkmenistan — parahatçylygyň we ynanyşmagyň Watany» diýlip yglan edilmegi mynasybetli Türkmenistanda we daşary ýurtlarda geçirilmegi meýilleşdirilýän çäreleriň Maksatnamasyny, Türkmenistanda we daşary ýurtlarda ýaýbaňlandyrmak boýunça geçiriljek çäreleriň Meýilnamasyny tassyklady. Bu resminamalarda ýokarda agzalan üç sazlaşygyň şanyna milli hem-de halkara derejede geçiriljek çäreler, olary ýerine ýetirmegiň anyk çelgileri öz beýanyny tapýar. «Türkmenistan» gazetiniň şu günki ― 2021-nji ýylyň 9-njy martyndaky sanynda bu Maksatnamada göz öňünde tutulan çäreler barada habar berildi. Göz öňünde tutulýan çäreleriň hatarynda aşakylar bar:
― 2021-nji ýylyň «Halkara parahatçylyk we ynanyşmak ýyly» diýlip yglan edilmegine bagyşlanyp, 11-12-nji dekabrda paýtagtymyzda geçirilmegi meýilleşdirilýän «Parahatçylyk we ynanyşmak syýasaty — halkara howpsuzlygyň, durnuklylygyň we ösüşiň binýady» atly halkara maslahat ýylboýy milli we halkara derejede guralan çärelerdir dabaralaryň özboluşly jemlenmesine öwrülip, edilen işlere hem ýetilen sepgitlere ser salmaga ajaýyp mümkinçilik bolar. Hut şoňa görä-de, bu halkara forum ähmiýeti boýunça degişli Maksatnamanyň esasy çäresi hasaplanýar;
― Ýurdumyzyň daşary syýasat edarasy, degişli ministrlikleri we pudak edaralary, döwletimiziň daşary ýurtlardaky diplomatik wekilhanalarydyr konsullyklary, jemgyýetçilik guramalary tarapyndan Yslam Hyzmatdaşlyk Guramasy bilen bilelikde halkara maslahat, parlament ýolbaşçylarynyň arasyndaky duşuşyk, Dünýä türkmenleriniň ynsanperwer birleşiginiň mejlisi, Magtymguly Pyragy, Muhammet Baýram han Türkmen, Soltan Sanjar, Jelaleddin Menguberdi ýaly şahsyýetlerimize bagyşlanan maslahatlardyr duşuşyklar we beýleki dabaralar geçiriler;
― Halkara söwda boýunça işewürleriň kongresi, «Sanly çözgüt — 2021» atly innowasion taslamalaryň bäsleşigi, Aşgabat şäheriniň esaslandyrylmagynyň 140 ýyllygy mynasybetli dizaýnerleriň binagärlik bäsleşigi, ulag ulgamy, nebitgaz pudagyna maýa goýumlary çekmek, Hazar deňzi we Aralýaka sebiti, azyk howpsuzlygy boýunça halkara forumlardyr duşuşyklar ykdysady we ekologiýa ugry boýunça geçiriljek çäreleriň özenini düzýär;
― Türkmen bedewiniň we alabaý itiniň şöhratyny dünýä ýaýmak üçin dürli görnüşli çäreleri guramak, alym-lukmanlaryň halkara forumyny, milli saglygy goraýşyň ösüşine bagyşlanan ylmy-amaly maslahaty, webinarlardyr talyplar üçin leksiýalary, dürli görnüşli sport çärelerini geçirmek, şeýle-de döwlet Garaşsyzlygymyzyň 30 ýyllyk ýubileýi mynasybetli «Meniň Watanym — Türkmenistan» atly üç dildäki multimediýa kitabyny taýýarlamak göz öňünde tutulýar;
― Türkmenistanyň Garaşsyzlygynyň şanly 30 ýyllygy, baky Bitaraplygynyň 25 ýyllygy, şeýle hem 2021-nji ýylyň «Türkmenistan — parahatçylygyň we ynanyşmagyň Watany» diýlip yglan edilmegi mynasybetli Türkmenistanda we daşary ýurtlarda geçiriljek çäreleriň Meýilnamasyna ýylyň dowamynda köpçülikleýin habar beriş serişdeleriniň gatnaşmagynda mediaforumlardyr metbugat maslahatlary, brifingler geçiriler, Türkmenistanyň daşary ýurtlardaky ilçileriniň hem-de daşary ýurtlaryň Türkmenistandaky ilçileriniň gatnaşmagynda telegepleşikler toplumy ýazgy ediler, şanly senelere bagyşlanan makalalaryň daşary ýurtlaryň neşirlerinde, habarlar agentlikleriniň saýtlarynda we internet sahypalarynda çap edilmegini, ýörite taýýarlanan gepleşiklerdir wideorolikleriň Aziýa — Ýuwaş umman teleradiogepleşikler birleşiginiň (ABU) torunda, «Россия-24», «МИР 24» ýaly iri teleýaýlymlarda görkezilmegini guramak boýunça degişli işler ýola goýlar. Dürli görnüşli ylmy-amaly maslahatlar, konsertler, döredijilik bäsleşikleridir festiwallar, talyplar üçin ýörite okuw sapaklary bu çäreleriň üstüni ýetirer.
Türkmen gelin-gyzlaryň saýty hereket edip başlady:Turkmengazet.com