Hormatly Prezidentimiz ulanmaga berlin Ahal welaýat ýokanç keseller hassahanasynda Ministrler Kabinetiniň göçme mejlisini geçirdi. Mejlisiň çäklerinde ýurdumyzyň saglygy goraýyş ulgamyny mundan beýläk-de has-da ösdürmäge degişli meseleler ara alnyp maslahatlaşyldy.
Milli Liderimiz mejlisiň barşynda eden çykyşynda häzirki döwürde koronawirus pandemiýasynyň dünýäde giňden ýaýrandygyny belledi. Bu ýokanjyň bütin adamzadyň abadançylgyna uly howp salýandygyny bellän hormatly Prezidentimiz dünýäde ýiti öýken sowuklama keseliniň ýüze çykan ilkinji günlerinden ýurdumyzda öňüni alyş çäreleriniň geçirilip başlanandygyny belledi.
Raýatlarymyzyň saglygyny goramak üçin ähli zerur işler amala aşyryldy. Döwlet serhedi aýratyn gözegçilige alyndy. Orta hem ýokary okuw mekdeplerinde, çagalar baglarynda, edara-kärhanalarda we beýleki jemgyýetçilik ýerlerinde zyýansyzlandyryş işleri yzygiderli alnyp barylýar. Zerur bolan derman we sarp ediş serişdeleri, lukmançylyk enjamlary, anyklaýyş we beýleki zerur serişdeler ýeterlik derejede satyn alyndy. Biziň ýurdumyz bu ugurda beýleki döwletler bilen tejribe alşyp durýar. Birleşen Milletler Guramasy, onun düzümleri hem-de Bütindünýä Saglygy Goraýyş Guramasy bilen ysnyşykly hyzmatdaşlyk edilip gelinýär. Bütindünýä Saglygy Goraýyş Guramasynyň wekiliýeti ýurdumyzda bolup, ýokanç kesellere garşy görülýän çäreleri bile ýakyndan tanyşmagy hem muňa aýdyň mysaldyr, diýip milli Liderimiz belledi.
Döwlet Baştutanymyz Türkmenistan ynsan saglygyna howp salýan şeýle wehimiň garşysyna göreşmekde dünýäniň ähli döwletleri hem-de halkara guramalary bilen hyzmatdaşlyk etmek üçin hemişe açykdyr diýip, nygtap geçdi. Milli Liderimiz Türkmenistanyň Hökümetiniň pandemiýa garşy ähli zerur çäreleri görmegi dowam edýändigini belledi. Döwlet Baştutanymyz geçirilen öňüne alyş işleriniň netijesinde, henize çenli ýurdumyzda koronawirus ýokanjy bilen kesellemek ýagdaýynyň hasaba alynmandygyny aýtdy. Munuň örän guwandyryjy ýagdaýdygyny bellän milli Liderimiz bu biziň uly üstünligimizdigini belläp, ýöne bu ýagdaý bilen arkaýynlaşmaly däldigini, alyp barýan işleriň has-da berkitmelidigini belledi.
Milli Liderimiz Ahal welaýatynda gurlup ulanmaga berlen ýokanç keseller hassahanasynyň dürli howply ýokan keselleriň öňüni almak hem-de olary bejermek boýunça ýurdumyzda anyk işleriň alyp barylýandygynyň ýene-de bir mysalydygyny aýtdy.
SAGLYGY GORAÝYŞ ULGAMYNYŇ DÜZÜMI HAS-DA GIŇELDILER
Hormatly Prezidentimiz mejlisiň barşynda ýakyn wagtda şolar ýaly birnäçe döwrebap lukmançylyk edaralaryny gurmagy ýurdumyzyň hökümetine tabşyrdy.
- Aşgabatda fiziologiýa ylmy kliniki merkezli täze hassahana gurlar. Bu hassahana ýokanç däl keselleriň öňüni almak we olaryň bejermek üçin giň mümkinçilikleri döreder. Şeýle hem hassahanada Aralyň adam saglygyna ýetirýän ýaramaz täsirlerini öwrenmek boýunça işler geçiriler. Bu ugurda okuwlar we ylmy-barlaglar alnyp barlar.
- Ýokanç däl keselleriň öňüni almak we olaryň garşysyna göreşmek boýunça täze milli maksatnama işlenip düzüler. Bu maksatnama Daşary işer ministrliginiň Araly halas etmek boýunça alyp barýan işleri bilen utgaşdyrylar.
- Ýurdumyzda wirusologiýa, bakteriologiýa we epidemiologiýa ylmy-önümçilik merkezi gurlar. Merkezde epidemiologiýa, molekulýar biologiýa, wirusologiýa, bakteriologiýa, gen inženeri, biotehnologiýa, ekologiýa hem-de biologik howpsuzlyk barada düýpli ylmy-barlag işleri alnyp barlar.
- Ilatymyzy derman serişdeler bilen doly üpjün etmek maksady bilen ýurdumyzda derman öndürýän birnäçe täze fabrikler gurlar.