Germaniýaly tälimçi Tomas Tuhel 2025-nji ýyldan Angliýanyň milli ýygyndysyna tälim berer. Bu barada milli ýygyndynyň metbugat gullugy “Х” (ozalky “Twitter”) jemgyýetçilik torundan habar berdi.
Angliýanyň Futbol assosiasiýasynyň baş direktory Mark Bullingem Tomas Tuheli milli ýygyndynyň baş tälimçisi hökmünde saýlap alandyklaryny belledi.
– Biz dünýäniň iň güýçli tälimçilerinden Tomas Tuheli saýlap alandygymyz üçin şatdyrys. Şeýle hem Angliýanyň güýçli tälimçilerinden Entoni Barri oňa goldaw berer. Tälimçini saýlamak işini jikme-jik alyp bardyk. Ozalky tälimçi Garet Sautgeýt wezipesini tabşyrandan soňra birnäçe tälimçileri saýladyk we olar bilen gepleşikler geçirdik. Tomas Tuhel özüniň baý tejribesi we maksadaokgunlylygy bilen bizi haýran galdyrdy. Entoni Barri hem Irlandiýanyň, Belgiýanyň we Portugaliýanyň ýygyndylary bilen halkara tejribesine eýe bolan ökde iňlis tälimçisidir – diýip, Mark Bullingem belledi.
Mark Bullingem Tomas we onuň toparynyň 2026-njy ýylda geçiriljek dünýä çempionatynda oňat netijeler görkezjekdigine ynanýarys diýip belläp geçdi.
51 ýaşyndaky Tomas Tuhel 2024-nji ýylyň maýynda Germaniýanyň “Bawariýa” toparynyň tälimçisi wezipesini tabşyrypdy. Ol mundan ozal, Angliýanyň “Çelsi”, Fransiýanyň “PSŽ”, Germaniýanyň “Borussiýa” we beýleki toparlaryna tälim beripdi.