Ozal hem habar berşimiz ýaly, Hytaýda dostluk saparynda bolýan türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Hytaý Halk Respublikasynyň Başlygy Si Szinpin bilen duşuşdy.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Hytaý Halk Respublikasynyň Başlygy Si Szinpiniň arasynda geçirilen duşuşykdan soňra sowgat alyşmak dabarasy geçirildi.
Türkmen halkynyň Milli Lideri Gurbanguly Berdimuhamedow Türkmenistanyň Prezidenti Serdar Berdimuhamedowyň adyndan Hytaý Halk Respublikasynyň Başlygy Si Szinpine Gadyrly atly ajaýyp ahalteke bedewini sowgat berdi. Bu iki ýurduň arasyndaky gatnaşyklaryň pajarlap ösýändigini alamatlandyrýan ajaýyp waka boldy.
Hytaý Halk Respublikasynyň Başlygy Si Szinpin ajaýyp sowgady buýsanç bilen kabul edip, Hytaýda ahalteke bedewlerine uly sarpa goýulýandygyny belledi.
Şeýle hem Hytaý Halk Respublikasynyň Başlygy Si SzinpinTürkmenistanyň meşhur ahalteke bedewleriniň watanydygyny belläp, mundan 12 ýyl ozal özüne Gahryman atly ahalteke bedewiniň sowgat berilýändigini uly buýsanç bilen ýatlap geçdi.