Angliýanyň “Mançester Siti” toparynyň resmi web sahypasynda toparyň baş tälimçisi Hosep Guardiola bilen 2 ýyllyk täze şertnama gol çekilendigini habar berildi.
Mundan ozal, habar beriş serişdelerinde 53 ýaşly tälimçiniň täze iş şertnamasynyň “1 + 1” meýilnamasyna laýyklykda baglaşylandygy barada maglumatlar peýda boldy. 2025/2026-njy möwsüminiň ahyrynda şertnama täze möwsüm üçin uzaldylyp bilinjekdigi bellenilipdi.
Guardiolanyň öňki şertnamasy şu möwsümiň ahyryna çenli dowam edýär.
Ispaniýaly hünärmen 2016-njy ýylda iňlis klubynyň baş tälimçisi wezipesine bellendi. Guardiolanyň ýolbaşçylygynda bu topar 6 gezek Angliýanyň çempiony boldy we Çempionlar ligasynda-da ýeňiji boldy.
Häzirki möwsümiň 11-nji tapgyryndan soň, “Mançester Siti” topary 23 utuk jemledi we häzirki wagtda ikinji orunda barýar.