Türkmen garyşyk söweş sungaty boýunça türgen Döwletjan Ýagşymyradow (25-8-1) 16-njy aprelde “Professional Fighters League” guramasynyň Belfast şäherinde geçiriljek ýaryşynda awstraliýaly Taýson Pedro (10-5) bilen duşuşar. Tutluşyk orta agram derejesinde meýilleşdirildi. Göni ýaýlym Aşgabat wagty bilen sagat 23:30-da başlanar.
Häzirki liganyň reýtinginde Ýagşymyradow ikinji orny eýeleýär, Pedro bolsa sekizinji ýerde ýerleşýär. Awstraliýaly türgen üçin bu tutluşyk PFL-däki ilkinji çykyş bolar — ol iki ýyl ozal “Ultimate Fighting Championship” guramasyndan gidenden soň sport karýerasyny tamamlaýandygyny yglan edipdi.
PFL-niň orta agram derejesindäki häzirki çempiony amerikaly Kori Anderson (20-6, 1 NC) bolup, ol 2025-nji ýylyň oktýabrynda Dubaýda geçirilen PFL ýaryşynda geçirilen titul söweşinde Ýagşymyradowy eminleriň çözgüdi bilen ýeňipdi.
Türkmen türgeni dürli ýyllarda ACB we ACA guramalarynyň çempiony boldy, şeýle hem 2024-nji ýylda PFL-niň ýarym agyr agram derejesinde geçirilen Gran-pri ýaryşynda ýeňiji boldy.
Ýagşymyradow bilen Pedronyň tutluşygyny “Belet” platformasynda tomaşa etmek mümkinçiligi bar. Aşgabat wagty bilen sagat 23:30-dan başlap göni ýaýlymda platformanyň sport ýaýlymlaryny görmek üçin döredilen «Premium» abunalygy arkaly elýeterli bolar.