Özbegistanyň raýatlary üçin ABŞ-nyň wiza düzgünini ýönekeýleşdirmek boýunça gepleşikleri eýýäm başlandy. Bu barada Özbegistanyň Amerikanyň Birleşen Ştatlaryndaky ilçisi Furkat Siddikow habar berdi.
Diplomatyň aýtmagyna görä, ilat üçin wiza talaplaryny ýeňilleşdirmek maksady bilen yzygiderli işler alnyp barylýar, emma garaşylýan netijä ýetmek aňsat proses däl.
«ABŞ-a wizasyz girmegiň gazanylmagy — uzak wagt talap edýän prosesdir. Şeýle-de bolsa, biz degişli gepleşikleri alyp barýarys. Elbetde, wiza düzgüniniň formasy we onuň girizilmeginiň şertleri ABŞ hökümetiniň içerki syýasatyna baglydyr. Häzirki wagtda biz diňe ABŞ bilen däl, eýsem Braziliýa, Kanada we beýleki ýurtlar bilen hem hemişelik esasda gepleşikleri geçirýäris, maksadymyz raýatlarymyza wizasyz syýahat etmek mümkinçiligini üpjün etmekdir», — diýip, ilçi belledi.
Furkat Siddikow häzirki wagtda özbek-amerikan gatnaşyklarynyň taryhy taýdan iň ýokary derejä ýetendigini we geljekde ösdürmek üçin uly mümkinçiliklere eýedigini nygtady.
«Diňe geçen ýylyň dowamynda Özbegistanyň we ABŞ-nyň Prezidentleriniň arasynda dört gezek aragatnaşyk boldy — iki telefon söhbetdeşligi we Nýu-Ýorkda hem-de Waşingtonda duşuşyk geçirildi. Munuň netijesinde uly möçberli ylalaşyklar gazanyldy. Bu ABŞ hökümetiniň Özbegistanda alnyp barylýan özgertmelere, ýurduň mümkinçiliklerine üns berýändigini we hyzmatdaşlyga taýýardygyny görkezýär», — diýip diplomat aýtdy.
Mundan başga-da, Furkat Siddikow 2026-njy ýylyň ýanwar aýynyň ahyryndan başlap, ABŞ-nyň raýatlary üçin Özbegistanda 30 güne çenli wizasyz düzgün giriziljekdigini habar berdi. Garaşylmagyna görä, bu ummanyň aňyrsyndan gelýän syýahatçylaryň sanyny üç esse artdyrar.