Şu gün ABŞ-nyň Kongresiniň binasynda ýurduň saýlanan Prezidenti Donald Trampyň wezipesine girişmek dabarasy geçirildi. Adatça, açyk asmanyň astynda geçirilýän bu dabara bu gezek Kongresiň uly zallarynyň birinde geçirilýär.
2024-nji ýylyň noýabrynda geçirilen saýlawlarda ýeňiş gazanan Donald Tramp kasam kabul edip, ABŞ-nyň 47-nji Prezidenti wezipesine resmi taýdan girişdi. Kasam kabul ediş dabarasynda çykyş eden Donald Tramp ABŞ-nyň “altyn asyrynyň” başlandygyny mälim etdi.
Bu kasam kabul ediş dabarasy ABŞ-nyň taryhyndaky 60-njy dabara boldy. Donald Tramp üçin bolsa 2-nji wezipesine girişmek dabarasy bolup durýar. Mundan ozal, Tramp 2017-2021-nji ýyllarda ABŞ-nyň 45-nji Prezidenti hökmünde ýurdy dolandyrypdy.
Ýurduň saýlanan Prezidenti Donald Trampyň wezipesine girişmek dabarasyna wezipesini tamamlaýan Prezident Jozef Baýden hem-de wise-prezident Kamala Harris hem gatnaşdy.
Şeýle hem dabara gatnaşyjylaryň hatarynda ABŞ-nyň tehnologiýa ägirtleri hem bar. Olar dünýäniň iň baý işewürleri bolan Ilon Mask, Jeff Bezos hem-de Mark Zukerbergdir.
Ozal hem habar berlişi ýaly, Ilon Mask ABŞ-nyň 47-nji Prezidenti Donald Trampyň administrasiýasynda iş alyp barar.
Donald Tramp wezipesine girişmek dabarasynyň öňüsyrasynda Ak Tama baryp, bu ýerde Prezident Jozef Baýden bilen gysga wagtlyk çaý başynda söhbetdeş boldy. Bu ýurduň wezipesini tamamlan ýolbaşçysynyň adyndan täze saýlanan ýolbaşçynyň hormatyna guralýan çaý söhbetdeşligi däbidir.
Dabara ABŞ-nyň ozalky Prezidentleri Barak Obama, Bill Klinton we Jorj Buş dagy hem gatnaşdy.