Owganystan Türkmenistan we Gazagystan bilen bilelikde Hyrat welaýatynda iri logistika merkezini gurmak babatda ylalaşyk gazandy. Bu logisitka merkeziniň sebitleýin söwdasyny ösdürmek üçin dörediljekdigi bellenildi.
Owganystanyň senagat we söwda ministriniň wezipesini ýerine ýetiriji Nuruddin Azizi “Reuters” habarlar gullugyna beren beýanatynda bu ugurda degişli ylalaşygyň golaýda Kabulda geçirilen Owganystan-Türkmenistan-Gazagystan üçtaraplaýyn duşuşykda gazanylandygyny habar berdi. Azizi bu ugurda 6 aýa golaý gepleşikleriň geçirilendigini belläp, ýene-de 2 aýdan taraplar degişli ylalaşygyň taslamasyny taýýarlajakdygyny aýtdy.
– Hyrat welaýatynda Owganystanyň, Gazagystanyň we Türkmenistanyň maýa goýumlary bilen logistika merkezi dörediler. Bu hem Demirgazyk-Günorta Aziýa ulag geçelgesiniň ugrunda gurlar. Bu logistika merkezinden nebit önümlerini Pakistan we beýleki Günorta Aziýa döwletlerine daşamak mümkinçiligi dörär – diýip Azizi belledi.
Onuň bellemegine görä, ilkinji tapgyrda Hyradyň ulag ugry boýunça uglewodorod serişdeleriniň daşamak kuwwaty 1 million tonna deň bolar.