Türki Döwletleriň Guramasynyň Baş sekretary Kubanyçbek Ömüraliýew Merkezi Aziýa döwletlerinde hem-de Azerbaýjanda saparda boldy. Onuň soňky amala aşyran saparlarynyň biri Gazagystan Respublikasy boldy.
Bu ýerde Gazagystanyň Prezidenti Kasym-Žomart Tokaýew bilen duşuşan Türki Döwletleriň Guramasynyň Baş sekretary Kubanyçbek Ömüraliýew ikitaraplaýyn we köptaraplaýyn gatnaşyklary ara alyp maslahatlaşdy.
Kasym-Žomart Tokaýew Gazagystanyň Türki Döwletleriň Guramasynyň esaslandyryjylarynyň biri hökmünde Türki döwletler bilen köptaraplaýyn hyzmatdaşlygyň ösdürilmegine uly gyzyklanma bildirýändigini belläp, guramanyň sekretariatynyň işine goldaw bermäge taýýardyklaryny mälim etdi.
Gazagystanyň Prezidenti häzirki döwürde guramanyň türki halklaryň arasyndaky hyzmatdaşlygy pugtalandyrmakda möhüm meýdança öwrülendigini belläp, gurama bilen söwda-ykdysady, medeni-ynsanperwer gatnaşyklary ýola goýmaga köp sanly döwletleriň we halkara guramalaryň gyzyklanma bildirýändigini aýtdy.
Taraplar Samarkant şäherinde geçirilen sammitde kabul edilen ylalaşyklaryň we öňe sürlen başlangyçlaryň durmuşa geçirilmegi babatda pikir alyşdylar.
2009-njy ýylda döredilen Türki Döwletleriň Guramasynyň 2023-nji ýyldaky 10-njy ýubileý sammitini Gazagystanda geçirmek meýilleşdirilýär.