Aýlagdaky Arap döwletleriň hyzmatdaşlyk Geňeşiň (AADHG) agza ýurtlarynyň we Merkezi Aziýa döwletleriniň Daşary işler ministrleriniň arasynda strategik gepleşikler boýunça birinji duşuşygyň çäklerinde Türkmenistanyň daşary işler ministri Raşid Meredow ikitaraplaýyn duşuşyklaryň birnäçesini geçirdi.
Türkmenistanyň daşary syýasat edarasynyň ýolbaşçysy Er-Riýaddaky duşuşygyň çäklerinde Saud Arabystany Patyşalygynyň daşary işler ministri Faýsal bin Farhan Al Saud, Oman Soltanlygynyň daşary işler ministri Saýýid bin Badr bin Hamad bin Hamud Al-Busaidi, Birleşen Arap Emirlikleriniň daşary işler we halkara hyzmatdaşlyk ministrliginiň Döwlet ministri Halifa Şahin Al-Marar, Bahreýn Patyşalygynyň daşary işler ministri Abdul Latif bin Raşid Al-Zayani, Katar Döwletiniň daşary işler ministri Şeýh Mohammed bin Abdulrahman Al-Tani, Kuweýt Döwletiniň Ministrler Kabinetiniň işleri boýunça döwlet ministri Şeýh Ahmed Nasser Al Mohammed Al Sabah hem-de Gazagystan Respublikasynyň daşary işler ministri Muhtar Tleuberdi bilen gepleşikler geçirip, hyzmatdaşlygyň möhüm ugurlaryna seredip geçdiler.
Ýola goýlan netijeli dialogy mundan beýläk hem ösdürmekde özara gyzyklanmalaryny belläp, taraplar ykdysadyýet we maýa goýum ulgamlarynda ikitaraplaýyn hyzmatdaşlygyň meselelerini ara alyp maslahatlaşdylar.
Diplomatlar şeýle-de sebit hem-de halkara gün tertibiniň özara gyzyklanma döredýän derwaýys ugurlary boýunça hem pikirleri alyşdylar.