Malaýziýanyň ykdysadyýet ministri Hajy Akmal Nasrulla bin Mohd Nasir 21–23-nji oktýabrda Aşgabatda geçiriljek «Türkmenistanyň nebiti we gazy – OGT 2026» atly 31-nji halkara maslahatyna we sergä gatnaşjak hökümet we işewürler toparyndan ybarat uly wekiliýete ýolbaşçylyk eder.
Wekiliýetiň düzümine Malaýziýanyň 20-den gowrak kompaniýasynyň wekilleri girer. Bu bolsa Türkmenistanyň we Malaýziýanyň telekeçileriniň arasynda göni işewürlik hyzmatdaşlygyny ösdürmek üçin täze mümkinçilikleri döreder.
OGT-de ilkinji gezek aýratyn Malaýziýanyň Milli pawilýony hödürlener. Ol işewür duşuşyklary geçirmek we geljegi uly hyzmatdaşlyk ugurlaryny ara alyp maslahatlaşmak üçin meýdança bolar.
Wekiliýetiň düzümine, şeýle hem “Malaysia Petroleum Resources Corporation (MPRC)” tarapyndan durmuşa geçirilýän halkara «Hello OGSE Turkmenistan» maksatnamasyna gatnaşýan nebit-gaz hyzmatlary we enjamlary (OGSE) pudagynyň 14 sany malaýziýaly kompaniýasy girer.
Bu kompaniýalar inženerçilik, enjamlar we konstruksiýalar önümçiligi, ulanmak we tehniki hyzmat, ýöriteleşdirilen tehniki hyzmatlar, deňiz amallaryny üpjün etmek hem-de sanly çözgütler ýaly giň ugurlarda öz mümkinçiliklerini hödürleýärler.
Şeýle uly düzümdäki malaýziýaly wekiliýetiň gatnaşmagy Türkmenistanyň işewürleri üçin halkara kompaniýalary bilen göni aragatnaşyk saklamaga, bilelikdäki taslamalary durmuşa geçirmäge, tehnologiýalary geçirmäge, önümçiligi ýerli derejede ösdürmäge, hünärmenleri taýýarlamaga we inženerçilik-tehniki hyzmatlar ulgamynda hyzmatdaşlyk etmäge täze mümkinçilikleri açýar.
Malaýziýanyň Türkmenistan bilen energetika ulgamynda möhüm hyzmatdaşlyk tejribesi bar. “PETRONAS” 1996-njy ýyldan bäri Türkmenistanda iş alyp barýar we şu döwürde Türkmenistanyň nebit-gaz pudagyna takmynan 12 milliard ABŞ dollary möçberinde maýa goýdy.
2026-njy ýylyň iýun aýynda hyzmatdaşlyk täze tapgyra çykdy. Gol çekilen ylalaşyklara laýyklykda, Türkmenistanyň Hazar deňzindäki türkmen böleginde ýerleşýän 19-njy we 20-nji deňiz bloklaryny mundan beýläk özleşdirmek, şeýle hem 11-nji, 12-nji, 13-nji we 14-nji bloklarda 2D seýsmiki barlaglary geçirmek göz öňünde tutulýar.
OGT 2026-a 20-den gowrak malaýziýaly kompaniýanyň gatnaşmagy halkara işewürler jemgyýetiniň Türkmenistana bolan gyzyklanmasynyň artýandygyny görkezýär we iri energetika taslamalaryndan başlap, iki ýurduň kompaniýalarynyň arasynda göni işewürlik gatnaşyklaryna çenli hyzmatdaşlygy giňeltmek üçin amaly meýdança döredýär.
OGT 2026 Aşgabatda «Energiýa. Hyzmatdaşlyk. Ösüş.» şygary astynda geçiriler.