20–22-nji awgust aralygynda Russiýanyň Sankt-Peterburg şäherinde geçirilen “LEFF-2026” kinoforumda Türkmenistanyň görnükli şahyry, akyldary Magtymguly Pyragy hakyndaky film görkezildi. Film XVIII asyryň beýik söz ussadynyň doglan gününiň 300 ýyllygy mynasybetli türkmen we özbek kinematografiýaçylarynyň bilelikdäki işi hökmünde döredildi.
Filmde şahyryň şahsyýetiniň kemala gelşi, Buharanyň we Hywanyň medreselerinde bilim alşy, şeýle hem halklaryň agzybirligine we jebisligine bolan üznüksiz ymtylyşy beýan edilýär. Filmde baş keşbi ýaş türkmen aktýory Ahmet Amandurdyýew ýerine ýetirdi.
Mundan ozal «Magtymguly Pyragy» filmi köp sanly kinofestiwallarda baýraklara mynasyp bolup, kino tankytçylarynyň ýokary bahasyna eýe boldy. Ol Aşgabatda geçirilen IV Halkara «Gorkut Ata» kinofestiwalynda «Iň gowy çeper film» ugry boýunça baş baýraga mynasyp boldy, Türkiýede geçirilen «Turan» kinofestiwalynda birinji baýragy eýeledi, Londonda geçirilen ECG Film Festival kinofestiwalynda tomaşaçylaryň söýgüsi baýragy bilen sylaglandy. Şeýle hem film Almaty şäherinde geçirilen «Ýewraziýa» we Kazan şäherinde geçirilen «Altyn Minbar» festiwallarynyň bäsleşik maksatnamalaryna girizildi.
Sankt-Peterburgda türkmen-özbek kinematografiýaçylarynyň bilelikdäki «Magtymguly Pyragy» filmi baş baýraga eýe bolmady, emma ýörite sylaga mynasyp boldy — film «Medeni kino dialogynyň ösdürilmegine goşan goşandy üçin» ugry boýunça laureatlaryň hataryna girizildi.
Umuman, LEFF 2026 kinofestiwalynda Türkmenistan, Özbegistan, Russiýa, Hytaý, Hindistan, Eýran we Belarus ýaly 13 ýurtdan jemi 40 çeper we dokumental film görkezildi.
Guramaçylar bilelikdäki taslamalary ösdürmäge aýratyn üns berdiler. Bu babatda Magtymguly Pyragy hakyndaky film döwletleriň arasyndaky üstünlikli döredijilik hyzmatdaşlygynyň aýdyň mysaly hökmünde çykyş edýär.