Garaşsyz, baky Bitarap Türkmenistanda ählihalk baýramy — Watanymyzyň özygtyýarlylygyny, halkymyzyň synmaz jebisligini alamatlandyrýan Türkmenistanyň Konstitusiýasynyň we Döwlet baýdagynyň güni bellenilýär. Paýtagtymyz baýramçylyk mynasybetli esasy dabaralaryň geçirilýän merkezine öwrüldi. Bu ýerde hormatly Prezidentimiz Serdar Berdimuhamedowyň gatnaşmagynda Konstitusiýa binasyna hem-de ýurdumyzyň Baş baýdagyna gül goýmak dabaralary boldy.
Döwlet Baştutanymyz Konstitusiýa binasynyň öňündäki meýdançada gurnalan ýörite ýere geçýär. Türkmenistanyň Döwlet senasy ýaňlanýar. Arkadagly Gahryman Serdarymyz berkarar Watanymyzyň döwlet binýatlarynyň, demokratik esaslarynyň, köpasyrlyk halk häkimiýetliligi ýörelgeleriniň mizemezligini alamatlandyrýan Konstitusiýa binasyna gül çemenini goýýar.
Soňra hormatly Prezidentimiz Serdar Berdimuhamedowyň awtoulagy Baş baýdak meýdançasynyň öňünde saklanýar. Bu ýere ýygnananlar döwlet Baştutanymyzy mähirli mübärekleýärler. Türkmenistanyň Döwlet senasy belentden ýaňlanýar.
Hormatly Prezidentimiz belent baýdak sütüniniň öňünde ajaýyp gül çemenini goýýar. Soňra döwlet Baştutanymyzyň göreldesine eýerip, dabara gatnaşyjylar hem gül desselerini goýýarlar.
Türkmenistanyň Konstitusiýasynyň we Döwlet baýdagynyň güni mynasybetli ýurdumyzyň ähli künjeklerinde-de dabaralar geçirildi. Olara belli artistler, aýdym-saz, tans we folklor toparlary gatnaşdylar. Dabaralarda Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ösüşiň täze belentliklerine tarap öňe barýan Garaşsyz, hemişelik Bitarap Watanymyzy, halkymyzyň jebisligini we agzybirligini wasp edýän ajaýyp aýdymlar ýaňlandy.