Golaýda «Awaza» milli syýahatçylyk zolagy sebit we halkara derejesindäki möhüm çäreleriň geçirilýän merkezine öwrüldi. Bu ýerde 7-9-njy oktýabry aralygynda Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň konsultatiw duşuşygy, GDA-nyň döwlet Baştutanlarynyň Geňeşiniň mejlisi, şeýle hem Hazar ekologiýa sammiti ýokary guramaçylyk derejesinde geçirildi
Halkara sammitleriň geçirilýän döwründe “Altyn asyr” ýapyk görnüşli paýdarlar jemgyýeti tarapyndan Awazada ilkinji gezek 5G ulgamy ornaşdyryldy. Bu barada “THP” habar berýär.
Bu döwrebap aragatnaşyk hyzmaty ýokary tizlikli interneti, maglumatlary bökdençsiz we gysga wagtyň içinde geçirmegi üpjün etmek bilen, halkara çäreleriň işini ýokary derejede guramaga we şöhlelendirmäge mümkinçilik döretdi.
Sammitler tamamlanan hem bolsa, Awazada ornaşdyrylan 5G ulgamynyň öz işini doly we durnukly ýagdaýda dowam etdirýändigini bellemek gerek. Häzirki wagtda syýahatçylyk zolagyna gelýän myhmanlar bu ýokary tizlikli aragatnaşykhyzmatlaryndan peýdalanyp bilerler.
Hazar deňziniň kenarynda ýokary tizlikli 5G ulgamynyň ornaşdyrylmagy Türkmenistanda sanly ykdysadyýeti ösdürmek we aragatnaşyk ulgamyny döwrebaplaşdyrmak boýunça alnyp barylýan döwlet syýasatynyň üstünlikli durmuşa geçirilýändiginiň aýdyň subutnamasydyr. Bu hyzmatda geljekde hem Awazada geçiriljek iri halkara maslahatlary, sergileri we forumlary iň ýokary halkara standartlaryna laýyklykda geçirmek üçin berk tehniki binýat döredýär.