Şu gün Türkmenistanyň Daşary işler ministrliginiň binasynda Türkmenistan bilen Ýewropa Bileleşiginiň (ÝB) arasynda 2024-nji ýylyň jemlerine bagyşlanan brifing geçirildi. Oňa ýerli we daşary ýurtly köpçülikleýin habar beriş serişdeleri bilen bir hatarda “Ata Watan Media” topary hem gatnaşdy.
Türkmenistan bilen ÝB-niň arasyndaky hyzmatdaşlygyň 2024-nji ýyl boýunça jemlerine hem-de 2025-nji ýyl üçin iş meýilnamalaryna bagyşlanan brifinge Türkmenistanyň daşary işler ministriniň orunbasary Mähri Bäşimowa, ÝB-niň Türkmenistandaky ilçisi, ÝB-niň Türkmenistandaky wekilhanasynyň ýolbaşçysy Beata Peksa, şeýle hem guramanyň Türkmenistanda iş alyp barýan ministrlikleriniň hem-de pudak edaralarynyň wekilleri gatnaşdy.
Türkmenistanyň daşary işler ministriniň orunbasary Mähri Bäşimowa, ÝB-niň Türkmenistandaky ilçisi, ÝB-niň Türkmenistandaky wekilhanasynyň ýolbaşçysy Beata Peksa 2024-nji ýylda Türkmenistan bilen ÝB-niň arasyndaky hyzmatdaşlygyň jemleri boýunça çykyş etdiler.
Taraplaryň belleýşi ýaly, 2024-nji ýyl Türkmenistan bilen ÝB tarapyndan baý ýyllaryň biri boldy. Ýylyň dowamynda dürli görnüşli çäreleriň 170-den gowragy geçirildi. Bu hem ýylyň dowamynda her iki günde bir çäräniň guralandygyny alamatlandyrýar.
Şeýle hem geçen ýylyň dowamynda ikitaraplaýyn ýokary derejedäki saparlar guraldy. Ýewropa Komissiýasynyň komissarlary Türkmenistanda saparda boldular, şol bir wagtda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň Brýussele sapary guraldy.
Ýewropa Bileleşigi bilen Türkmenistan ulag, bilim hem-de “ýaşyl ykdysadyýet” ýaly beýleki ugurlarda köp sanly taslamalary durmuşa geçirýär. Bilim ulgamynda “Erasmus+” taslamasynyň çäklerinde alyş-çalyş maksatnamalary ýerine ýetirilýär.
Ulag ulgamynda hem Türkmenistan hem-de Merkezi Aziýa döwletleriniň arasynda hyzmatdaşlygy ösdürmäge aýratyn ähmiýet berilýär. Bu ugurda ýokary derejedäki duşuşyklar guraldy.
2025-nji ýyl boýunça iş meýilanamalary barada durlup geçilip, bu ugurda üstümizdäki ýylda ýene-de ençeme çäreleri guramak göz öňünde tutulýar. “Merkezi Aziýa+Ýewropa Bileleşigi” formatynda ÝB-niň ýolbaşçylary bilen Merkezi Aziýanyň döwlet Baştutanlarynyň sammitine taýýarlyk görülýär.
Üstümizdäki ýylda ÝB-niň daşary gatnaşyklar boýunça Ýokary komissary Kaý Kallasyň Aşgabada sapary göz öňünde tutulýar. Şeýle hem türkmen tarapyndan ýokary derejeli wekiliýetleriň Brýussele saparlaryny amala aşyrmak maksat edinilýär.
Mundan başga-da, ÝB-niň zenan ýolbaşçylarynyň hem gatnaşmagynda Aşgabatda zenanlar forumy guramak barada teklipler beýan edildi. Türkmenistanyň halk hojalygynyň dürli pudaklarynda zenanlaryň ornunyň pugtalandyrylmagyna aýratyn ähmiýet berýändigi we şonuň üçin bu forumyň ähmiýetiniň uludygy bellenildi.