Ýewropa ýurtlarynda koronawirus ýokanjyna garşy girizilen çäklendirmeler ýuwaş-ýuwaşdan aýrylyp başlandy. Fransiýanyň paýtagty Pariž şäherindäki “Disneýland” güýmenje seýilgähi 7,5 aýdan soňra täzeden işläp başlady.
“Disneýland” seýilgahinde howpsuzlyk çäreleri berk berjaý ediler. Seýilgähiň ýapyk binalardaky güýmenje ýerlerine sygymy boýunça 50 göterim adam kabul edilýär. Açyk ýerlerde bolsa 65 göterime rugsta berilýär. Seýilgähiň dowamynda agyz-burun örtüklerini dakynmak hökmanydyr. Fransiýadaky “Disneýland” seýilgähi ýurduň syýahatçylyk girdejisiniň 6 göterimini tutýar. 1992-nji ýylyň 12-nji aprelinde ulanmaga berlen bu seýilgäh 2018-nji ýylda her gün takmynan 27 müň adam kabul edýärdi.
Şol bir wagtda Fransiýanyň köçelerinde örtük dakynmak zerurlygy aradan aýrylýar. Ýöne stadionlarda, bazarlarda örtük dakynmaga dowam ediler.
Awstriýada köpçülikleýin çäreleri guramak babatda girizilen çäklendirmeler 2 hepdeden gowşadylyp başlar. Respirator örtükleriň ýerine adaty örtükleri dakynmaga rugsat berler. Awstriýanyň hökümetiniň habar bermegine görä, ýurtda ýagdaý çalt depginde gowulaşyp barýar. 1-nji iýuldan köçe çykmak gadaganlygy ýatyrylar. Restoranlar gijeleri hem işlär. Baýramçylyk we toý dabaralaryny gijeleri hem gurnamaga mümkinçilik berler.
Italiýada köp adamyň gatnaşmagynda toý dabaralaryny geçirmäge rugsta berilýär. Ýöne gatnaşýanlardan saglyk kepilnamasy talap ediler. Toý dabarasyny gurnaýan tarap myhmanlaryň doly sanawyny taýýarlap, olaryň arasynda kesellänler bar bolsa maglumat bermäge borçly edilýär.