Şu günler Özbegistanyň paýtagty Daşkent şäherinde Agyr atletika boýunça Aziýa çempionaty dowam edýär. Yklymyň bu möhüm ýaryşynda türkmen türgenleri hem çykyş edýärler we baýrakly orunlara mynasyp bolýarlar.
Daşkentden ýene-de bir hoş habar gelip gowuşdy. Türkmenistanyň ýygyndysynyň düzüminde ýene bir bürünç medal gazanyldy. Ony 29 ýaşly Rejepbaý Rejepow gazandy. Ol 81 kg agramda çykyş edip, yklymyň 3-njisi bolmagy başardy.
81 kg agramda baýrakly orunlary eýelemek ugrunda 10 ýurtdan 9 türgen gatnaşdy. Olaryň arasynda birnäçe gezek Olimpiýa oýunlarynyň çempiony bolan hytaýly agyr atletikaçylar hem bardy. Emma muňa garamazdan, türkmen türgeni hem baýrakly orunlar üçin soňuna çenli göreşdi.
Netijede, Rejepbaý Rejepow itekläp hem-de silterläp götermede jemi 341 kilogram agyrlykdaky agramy göterip, 3-nji orny eýeledi. Bu ugurda birinji orny hytaýly türgen Lýu Sýaszýun, ikinji orny bolsa özbek türgen Muhammadkodir Toştemirow eýeledi.
Aziýa çempionatynda üçünji orny eýelän Rejepbaý Rejepow Türkmenistan toparyna Tokioda geçiriljek Olimpiýa oýunlaryna saýlanmakda möhüm 66 utuk gazandyrdy.